Metro Georgia-მ, Omnibus Express-მა და Georgian Bus-მა რიგ მიმართულებაზე მგზავრობის ფასი გაზარდა. როგორც მგზავრთგადამყვან კომპანიებში „ბიზნესპრენიუსს“ განუცხადეს, მგზავრობის საფასური 5 ლარით გაძვირდა, რაც გამოწვეულია ქვეყანაში საწვავის ფასის მატებით.
როგორც Metro Georgia-ში „ბიზნესპრესნიუსს“ განუცხადეს, მგზავრობის ფასი გაიზარდა ყველა მიმართულებაზე. ფასნამატმა 5 ლარი შეადგინა.
„5 ლარი დაემატა ბილეთებს. ფასები გაზრდილია ყველა მიმართულებაზე“, – განუცხადეს „ბიზნესპრესნიუსს“ Metro Georgia-ში.
Omnibus Express-ში „ბიზნესპრესნიუსს“ უთხრეს, რომ 5 ლარით გაიზარდა მგზავრობის ფასი თბილისი-ქუთაისის მიმართულებით. მათივე ცნობით, ამ ეტაპზე სხვა რეისებზე ფასების ზრდა დაგეგმილი არ არის.
„თბილისი-ქუთაისი-თბილისის ღირებულება 30 ლარია, ამ ეტაპზე სხვა რეისებზე ღირებულების გაზრდა არ იგეგმება“, – განუცხადეს „ბიზნესპრესნიუსს“ Omnibus Express-ში.
ყველა მიმართულებაზე გაზარდა ფასები Georgian Bus-მაც. კომპანიაში განმარტავენ, რომ ტარიფების ცვლილება ქვეყანაში საწვავის გაძვირებით არის გამოწვეული.
„30.03.26 რიცხვის 00:00 საათიდან მგზავრობის ღირებულება ნაცვლად 25 ლარისა გახდა 30 ლარი, მაგრამ არსებული ფასდაკლებები, რაც მოქმედებდა მანამდე (ანუ, საიტიდან 2 გზის შეძენის შემთხვევაში, მოქმედებს ფასდაკლება და ნაცვლად 60 ლარისა, მგზავრობის ღირებულება იქნება 50 ლარი, ასევე, 5 და მეტი მგზავრის შემთხვევაში, მოქმედებს ჯგუფური ფასდაკლება ერთი მგზავრის გადაყვანა გამოვა 25 ლარი, ნაცვლად 30 ლარისა. ჩვენი კომპანიისათვის მგზავრობის ფასის მატება პირდაპირ დაკავშირებულია საწვავის ფასის მატებასთან“, – უთხრეს Georgian Bus-ში „ბიზნესპრესნიუსს“.
შეგახსენებთ, ახლო აღმოსავლეთში მიმდინარე კონფლიქტის პარალელურად გლობალურ ბაზრებზე ნედლი ნავთობის საორიენტაციო ფასი იზრდება. საერთაშორისო ბირჟებზე მიმდინარე ტენდენცია საქართველოს ბაზარზე დაახლოებით 9 მარტიდან აისახა. კერძოდ, ბრენდულ ბენზინგასამართ სადგურებზე საწვავის ფასი რამდენიმე ეტაპად გაიზარდა. ამ დროის მონაცემებით კი ლიტრზე ფასი 17-დან 75 თეთრამდეა გაზრდილი.
www.bpn.ge
Loading ...