ISFED-ის პარალელური დათვლის დაზუსტებული შედეგებით ოცნებას 45.8%-ის ნაცვლად 47.6% აქვს

სამართლიანი არჩევნები (ISFED) შიდა აუდიტის შედეგების შემდეგ გამოვლენილ ხარვეზებზე განცხადებას ავრცელებს. ორგანიზაციის ცნობით, გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში, რომლის შედეგადაც ქართულ ოცნებას არჩევნებზე ხმების 45.8%-ის ნაცვლად 47.6% აქვს. 

სამართლიან არჩევნებში აცხადებენ, რომ აღნიშნული სხვაობა გავლენას არ ახდენს არცერთი საარჩევნო სუბიექტის მიერ მიღებული მანდატების რაოდენობაზე. 

განცხადებას გამოეხმაურა ევროპული საქართველოს ლიდერი, გიგა ბოკერია. ბოკერიას თქმით, მმართველმა პარტიამ ეს ხარვეზი, დიდი ალბათობით, უკანონო მიყურადებით იცოდა და მოლაპარაკებებისას გადათვლის შემოთავაზება “მახის დაგება” იყო.

სამართლიანი არჩევნები საბოლოო შედეგების დაზუსტებულ ინფორმაციას წარმოადგენს, რომლის ცდომილების ხარისხი 0.7%-ია:

• ქართული ოცნება – 47.6%

• ერთიანი ნაციონალური მოძრაობა – ძალა ერთობაშია – 27.4%

• ევროპული საქართველო – 3.8%

• პატრიოტთა ალიანსი – 3.2%

• ლელო – 3.2%

• სტრატეგია აღმაშენებელი – 3.1%

• გირჩი – 3.0%

• მოქალაქეები – 1.3%

• ლეიბორისტული პარტია – 1.0%

• ნინო ბურჯანაძე – ერთიანი საქართველო – 0.9%

სამართლიანი არჩევნების 1-ელ ნოემბერს გამოქვეყნებული შედეგებით, საპარლამენტო არჩევნებში ქართულმა ოცნებამ ხმების 45.8% მიიღო, ენმ-ძალა ერთობაშიამ – 26.4%, ევროპულმა საქართველომ – 3.7%. ცდომილების ხარისხი ამ შემთხვევაშიც 0.7%-ია.