შაბათი, სექტემბერი 21, 2019
Follow Us

ZELENSწინასწარი მონაცემებით, უკრაინის საპარლამენტო არჩევნებში პრეზიდენტ ვოლოდიმირ ზელენსკის პარტია - ხალხის მსახური - ლიდერობს. ცენტრალური საარჩევნო კომისია აცხადებს, რომ ამ ეტაპზე დათვლილია ხმების დაახლოებით 44 პროცენტი.

ადგილობრივი დროით დილის 9 საათისთვის, ზელენსკის პარტია უკრაინის ვერხოვნა რადაში 199-დან 125 მანდატს მოიპოვებს. ის პარტიული სიებით გამარჯვებულებშიც 42 პროცენტით (122 მანდატი) ლიდერობს. უკრაინის კონსტიტუციის მიხედვით, ვერხოვნა რადაში კანონმდებლების ნახევარს პარტიული სიებით ირჩევენ, ნახევარი კი თითომანდატიანი ოლქებიდან კომპლექტდება. ამ ოლქებში ადგილობრივ პოლიტიკოსებს აქვთ შანსი პარტიების პოპულარობა დაძლიონ და გაიმარჯვონ.

თუ შედეგები შენარჩუნდა, ეს იქნება უპრეცედენტო შემთხვევა უკრაინის უახლეს ისტორიაში. საქმე იმაშია, რომ საბჭოთა კავშირისგან დამოუკიდებლობის მოპოვების შემდეგ, უკრაინის საპარლამენტო არჩევნებზე ჯერ არცერთ პარტიას არ მოუგია 12%-ზე მეტი უპირატესობით.

მეორე ადგილზე ჯერჯერობით პრორუსული ოპოზიციური პარტიაა, სახელწოდებით ოპოზიციური პლატფორმა-სიცოცხლისთვის. თუ მან პოზიციები შეინარჩუნა, უკრაინის პარლამენტში 43 მანდატს დაესაკუთრება. პარტიას ხელმძღვანელობს ვიქტორ მედვედჩუკი, ყოფილი პრეზიდენტის, ლეონიდ კუჩმას თანამებრძოლი და რუსეთის პრეზიდენტის ვლადიმირ პუტინის ერთ-ერთი ყოფილი თანაშემწე.

21 ივლისს გამართულ არჩევნებზე ამომრჩეველთა აქტივობა 50%-ზე დაფიქსირდა. აღნიშნულ მონაცემებს ავრცელებს უკრაინის საპარლამენტო არჩევნების ზედამხედველი "ოპორა", რომელიც დარღვევებსაც ადევნებდა თვალს.

წინასწარი მონაცემებით, ექსპრეზიდენტ პეტრო პოროშენკოს ევროპული სოლიდარობის პარტიამ 9 პროცენტი აიღო. ყოფილი პრემიერის იულია ტიმოშენკოს მამულმა - 8.1; ხმას - როკ-ვარსკვლავ სვიატოსლავ ვაკარჩუკის პარტიას 6.38 პროცენტი აქვს. როგორც ჩანს, მათ 5-პროცენტიანი ბარიერი წარმატებით დაძლიეს.

 

www.amerikiskhma.com

Comments powered by CComment

მოიწონეთ გვერდი

Search