ოთხშაბათი, ივლისი 17, 2019
Follow Us

ხანდახან ტვ “კავკასიას” მივაპყრობ ხოლმე სმენას,  ყოფილი, სტუდენტობისდროინდელი, მეგობრის დათო აქუბარდიას და მისი სტუმრების  პოლიტიკური გულისფერთხვის გასაზიარებლად და მოსასმენად.. ამ ბოლო დროს, ბატონი დავითი ხშირად წუწუნებს სიგარეტის უმოწყალო გაძვირებასთან დაკავშირებით, ცხადია, მხოლოდ მოწევა არ აზიანებს მის ჯანმრთელობას, მავნე კვამლს  ფინანასური წერტილოვანი დარტყმებიც დაემატა. ერთხელ მოუწოდა კიდეც მწეველებს, სანამ ეს ოხერი მთავრობა  მთლიანად თუთუნის ქაჩვაზე გადაგვიყვანს და ცოცხლად დაგვმარხავს, შევიკრიბოთ, გავერთიანდეთ და

ავბუნტდეთო.   ბოლო დროს ამ თემაზე ხმას აღარ იღებს. შეეეგუა ვითარებას  ან კიდევ ისეთ ხალხს იწვევს სტუდიაში, ორ-ორი “პაჭკა” სიგარეტი  ან ილიკო ჩიგოგიძესავით 10 კვერცხი (თუთუნის ზომის ერთეულია) თუთუნი  რომ უდევთ ჯიბეში. სარეკლამო ჭრებიც შეამცირა, ალბათ სიგარეტის ეკონომიის მიზნით…როგორც ყოველთვის, ახლაც ცამდე მართალია ეს კაცი, ყველაფრის ფასების ზრდით  ევროსტანდარტებს რომ გვაახლოებენ, ის რატომ არ აწუხებთ, ხალხი ჯიბეგაფხეკილი რომ ჰყავთ მიგდებული… გერმანიაში, სადაც ჯერ კიდევ ვიმყოფები, სიგარეტი ძალიან ძვირია, ისეთი ძვირია, რომ მოწევის ხალისი დაგეკარგება, თუმცა აქ ბევრი არც ეწევა, იშვიათად შეხვდები ქუჩაში პირში სიგარეტგაჩრილს, უფრო ქალები აქტიურობენ…ამას წინათ, მეტროს ვაგონში  ჩემს წინ მჯდომმა ბერეტიანმა გოგონამ ჩასვლის წინ ისე ოსტატურად და ელვისებურად გაახვია თუთუნი ქაღალდში, ჩემი მეუღლის ბაბუა მოსე მჟავანაძე გამახსენა, ცხონებული ამ პროცედურას ვირტუოზულად ასრულებდა… მოკლედ, გერმანიაში ვერსად მოკრავ ყურს ფრაზას : “თუ ძმა ხარ, მომაწევიე ერთი  შენი პაპიროსი, მომკლა ამ სხვისმა პაპიროსმა”… საქართველოშიც მალე ამოიღებენ ხმარებიდან ამ ფრაზას, პაპიროსს თუ ისესხებ ვინმესგან, საბანკო გარანტიაც უნდა წარუდგინო, რომ უკან ჩამსესხებელი ხარ.
საზოგადოდ, შემაწუხა ამ პრობლემამ,  თორემ თავად აღარ ვეწევი კაი ხანია, ჯანმრთელი ცხოვრების წესიდან გამომდინარე, არც არასდროს ვყოფილვარ სტაბილური მწეველი, ძალიან მეადვილება გადაგდება, მაგაზე ადვილი არაფერია. ხუთასჯერ მაქვს თავი დანებებული (მგონი, ჩარლი ჩაპლინს დავესესხე თუ მარკ ტვენს, კარგად არ მახსოვს, რომელმა თქვა მსგავსი რამ.. “და თუ არ უთქვამს, ვინმე იტყოდა”, ფრანსუა ვიიონისა არ იყოს )…..  მოკლედ,  სრული სვლით წინ , ევროპისაკენ. დავეწიოთ, მაგრამ არ გავუსწროთ, უკანგამოხეული შარვალი რომ არ გამოგვიჩნდეს…

მოიწონეთ გვერდი

Search