სამშაბათი, ივლისი 16, 2019
Follow Us

რადგან დროებით გერმანიაში ვარ, „გურიაTV”-დან  მთხოვეს, აქაური და იქაური ცხოვრების მცირე შედარება გამეკეთებინა. ამის გაკეთება კი, თუნდაც ზედაპირულად, საკმაოდ რთულია, რადგან, ყველაფერი ცუდი აქაა ანუ საქართველოში, რაც ყველაფერი კარგია, იქაა –  გერმანიაში. ცხოვრების მხოლოდ ერთ ასპექტზე გავაკეთებ აქცენტს: ადამიანის ცხოვრების ელემენტარული  პირობები. გერმანიაში ყველა მუშაობს და, შესაბამისად, სოლიდურ ანაზღაურებასაც იღებს.  ვინც არ მუშაობს, მას სახელმწიფო ეხმარება. არც მეტი , არც ნაკლები – თვეში 800 ევროს ფარგლებში.  ეს კი აქაური ფასების პირობებში მცირე

შემწეობა არ არის.  “ლამბორჯინს” ვერ იყიდი, მაგრამ მოკრძალებულად და კომფორტულად იცხოვრებ.  ვისაც დახმარების ეს მოცულობა არ აკმაყოფილებს, ლეიბებსა და საბნებში გახვეული წევს, სადარბაზოებთან და ბერლინის “მშრალი ხიდების” ქვეშ მოწყალებას იღებს, როგორც ფულადი, ისე ნატურის სახით.ეს მათი არჩევანია და არც უშლიან. რაც შეეხება პენსიებს, ისეთი მაღალია, რომ ჩვენი რეალობის შემხედვარე, ვერც გაამხელ. სოციალურად დაუცველებსა და პენსიონერებს იმიტომ გავუსვი ხაზი, რომ ჩვენთან ადამიანების ეს კატეგორია  ყველაზე მოწყვლადია ანუ დღემუდამ სიცოცხლისათვის უწევთ ბრძოლა და ჯახირი, თან სრული უპერსპექტივობის ფონზე. ბუნებრივია, აქ ადამიანები, თუ რაიმე დაავადება არ დაეტაკათ, საკმაოდ ხანგრძლივად ცხოვრობენ, თუმცა ეს მხოლოდ კარგ ჭამა -სმაზე არ არის დამოკიდებული. მათი მთავარი საზრუნავი ჯანსაღი ცხოვრების წესია.  შესაბამისად ცხოვრობენ და იკვებებიან, სუნთქავენ სუფთა ჰაერს, შაბათ-კვირას დარბიან ან სეირნობენ. 80-ს გადაცილებული ბებიები სპრინტერებივით დაჰქრიან ველოსიპედებით.    მოხსნილი აქვთ ყოველდღიური ყოფის წნეხი, ლუკმა პურისა და წამლის ფულის შოვნის რუტინა. ვინმემ არ იფიქროს, უცხოელების ცხოვრებას  ვაიადეალებდე (თუმცა არც უამისობაა, რადგან არსებობს საფუძველი) უბრალოდ, ასეთია რეალობა, რადიკალურად განსხვავებული და კონტრასტული. ეს კი მხოლოდ ერთ ასპექტია ცხოვრებისა.  ადამიანთა ერთ კატეგორიაზე გავამახვილე ყურადღება, ანუ მავანნი ცხოვრობენ, მავანნი კი, ანუ კაცია მუნჯაძეები მხოლოდ ცოცხლობენ, სანამ გაუკუღმართებული ცხოვრების მატარებელი არ გააცალკავებს ნაწილებად…

მოიწონეთ გვერდი

Search