Fox News: რუსეთმა და აშშ-მა ომის დასრულების გეგმა შეიმუშავეს – რას ითვალისწინებს სამეტაპიანი გეგმა

Fox News -ის ინფორმაციით, რუსეთმა და შეერთებულმა შტატებმა შეიმუშავეს სამეტაპიანი სამშვიდობო გეგმა რუსეთ-უკრაინის ომის დასასრულებლად, იტყობინება Fox News საუდის არაბეთში მოლაპარაკებებთან ახლოს მყოფი უცხოელი დიპლომატების ციტირებით.

გეგმა, ტელეკომპანიის ცნობით, გულისხმობს ცეცხლის შეწყვეტას, უკრაინაში არჩევნების ჩატარებას და მხოლოდ ამის შემდეგ საბოლოო სამშვიდობო შეთანხმების ხელმოწერას.

რუსეთი და შეერთებული შტატები უკრაინაში არჩევნებს განიხილავენ, როგორც “პროცესის მოგვარების წარმატების გასაღებს”, – აცხადებენ Fox News-ის წყაროები. ეს პირობა, ტელეკომპანიის აზრით, გამოიწვევს დავას მხარეებს შორის, რადგან რუსეთი “არ ატარებს რეალურ არჩევნებს”, უკრაინა კი არ მიიღებს “პრორუსული მარიონეტული პრეზიდენტის დანიშვნის პერსპექტივას”.

„პუტინი აფასებს მარიონეტული პრეზიდენტის არჩევის ალბათობას, როგორც საკმაოდ დიდს და ასევე დარწმუნებულია, რომ ნებისმიერი სხვა კანდიდატი, გარდა უკრაინის ამჟამინდელი პრეზიდენტისა, იქნება უფრო მოქნილი და მზად მოლაპარაკებებისა და დათმობებისთვის. თავის მხრივ, დონალდ ტრამპი მზადაა მიიღოს არჩევნების ნებისმიერი შედეგი, მათ შორის პრორუსული მარიონეტის არჩევის შესაძლებლობაც“, – ასეტია ტელეკომპანიის ინფორმაციით უკრაინული მხარის პოზიცია.

მანამდე ევროპარლამენტარმა სერგეი ლაგოდინსკიმ წყაროებზე დაყრდნობით გაავრცელა ინფორმაცია რუსეთ-უკრაინის ომის მშვიდობიანი მოგვარების მსგავსი გეგმის შესახებ. მან გეგმის იმ ნაწილს, რომელიც შეთანხმების ხელმოწერამდე არჩევნებს გულისხმობს, “ტრამპის საჩუქარი პუტინს” უწოდა.

„ჩვენთვის ევროპელებისთვის აბსოლუტურად ნათელი უნდა იყოს, რომ არჩევნები [უკრაინაში] ფინალური ეტაპის შემდეგ უნდა ჩატარდეს და არა მის წინ. მათ შორის იმიტომ, რომ საბოლოო შეთანხმება არ შეიძლება იყოს პრორუსული კანდიდატის არჩევნებში გამარჯვების შედეგი“, – მიიჩნევს დეპუტატი.

რუსეთის, შეერთებული შტატების ან უკრაინის წარმომადგენლებს ჯერ არ გაუკეთებიათ კომენტარი ომის დასრულების გეგმის შესახებ ცნობებზე.

წყარო: meduza.io