„ენბიეის“ მწვრთნელი და მოთამაშეები უკანონო აზარტულ თამაშებთან დაკავშირებული გამოძიების ფარგლებში დააკავეს. ამის შესახებ ინფორმაციას „ბიბისი“ ავრცელებს.
როგორც აშშ-ის გამოძიების ფედერალური ბიუროს დირექტორმა, კეშ პატელმა განაცხადა, 30-ზე მეტ ადამიანს ბრალი წაუყენეს ორ ცალკეულ, მაგრამ ურთიერთდაკავშირებულ გამოძიებასთან დაკავშირებით, რომელიც მოიცავდა აშშ-ის უმაღლეს საკალათბურთო ლიგას, „ენბიეის“ და ორგანიზებულ დანაშაულს.
დაკავებულებს შორის არიან „პორტლენდ ტრეილ ბლეიზერსის“ მთავარი მწვრთნელი ჩონსი ბილაფსი, ასევე ტერი როზიერი, რომელიც „მაიამი ჰიტში“ თამაშობს.
პატელის თქმით, სქემები მოიცავდა ათობით მილიონი დოლარის უკანონო მოგებას საბანკო თაღლითობიდან, ფულის გათეთრებიდან, გამოძალვიდან და აზარტული თამაშებიდან.
მისივე თქმით, ერთ-ერთი გამოძიება ეხება სპორტულ ფსონებს, ხოლო მეორე პოკერის თამაშების გაყალბებას.
ოფიციალური პირების თქმით, ერთ შემთხვევაში, რომელიც 2023 წლის მარტში მოხდა, როზიერმა თავის კონტაქტებს უთხრა, რომ თამაშს განსაზღვრულ დროზე ადრე დატოვებდა, სავარაუდოდ, ტრავმის გამო, რის შემდეგაც ისინი ფსონებს დებდნენ მოთამაშეზე, რომელიც ვერ მიაღწევდა თავის მოსალოდნელ სტატისტიკას.
აშშ-ის პროკურორის, ჯოზეფ ნოჩელას თქმით, ორივე საქმეში რამდენიმე ბრალდებულს ბრალი უკვე წაუყენეს, მათ შორის „კლივლენდ კავალიერსის“ ყოფილ მოთამაშეს და მწვრთნელის თანაშემწეს, დეიმონ ჯონსს.
პროკურორების თქმით, საქმეში ნიუ იორკში მცხოვრები რამდენიმე კრიმინალური ოჯახი იყო ჩართული.
Loading ...