საქართველოს ჯანდაცვის სამინისტროს დაავადებათა კონტროლის ეროვნული ცენტრი კორონავირუსით ინფიცირების შესახებ სტატისტიკას ყოველკვირეულად აღარ გაავრცელებს. ინფორმაცია განახლდება მხოლოდ თვეში ერთხელ – უთხრეს რადიო თავისუფლებას ჯანდაცვის სამინისტროში.
“გადაწყვეტილების მიზეზია კორონავირუსის დაღმავალი ტენდენცია და ეპიდსიტუაციის სტაბილიზაცია” , – აღნიშნეს სამინისტროში.
ყოველდღიური სტატისტიკის ნაცვლად ყოველკვირეული მონაცემების გამოქვეყნება ჯანდაცვის სამინისტრომ მაისის პირველ ნახევარში დაიწყო. ამ დრომდე მონაცემები მედიისთვის ხელმისაწვდომი სამშაბათობით იყო, თუმცა დღეს პირველად ინფორმაცია არ განახლდა.
2022 წლის 2 სექტემბრის მონაცემებით, სულ აღრიცხულია კორონავირუსით ინფიცირების 1 762 206 შემთხვევა. აქედან 16 900 ადამიანი გარდაიცვალა.
განახლებული სტატისტიკა ოქტომბრის დასაწყისში გამოქვეყნდება.
Loading ...
