CNN – უკრაინაში ამერიკული დახმარების უახლესი პაკეტით გათვალისწინებული ტვირთის ჩატანა დაიწყეს

ჯო ბაიდენის ადმინისტრაციის უახლესი დახმარების პაკეტიდან ტვირთმა უკრაინაში ჩასვლა უკვე დაიწყო, – ამის შესახებ CNN-ს თეთრი სახლის ოფიციალურმა წარმომადგენელმა განუცხადა.

პრეზიდენტმა ბაიდენმა რამდენიმე დღის წინ უკრაინისთვის 800 მილიონი დოლარის ღირებულების იარაღის, საბრძოლო მასალისა და უსაფრთხოების დახმარების დამატებითი პაკეტის გამოყოფას მხარი დაუჭირა.

თავდაცვის სექტორის მაღალჩინოსანმა CNN-ს განუცხადა, რომ იარაღითა და აღჭურვილობით დატვირთული პირველი რეისი რეგიონში უახლოეს 24 საათში უნდა ჩავიდეს, ტვირთს საზღვარზე უკრაინელები მიიღებენ და ქვეყანაში შეიტანენ.

ცნობისათვის, აშშ-მა უკრაინას 3 მილიარდზე მეტი აშშ დოლარის ღირებულების სამხედრო დახმარება გამოუყო.