გარიგებულ თამაშებში მონაწილეობის გამო ზუგდიდის „დინამოს“ და მის ფეხბურთელებს სასჯელი დაეკისრა

საქართველოს ფეხბურთის ფედერაციის სადისციპლინო და დავების განმხილველი კომიტეტის გადაწყვეტილებით, გარიგებულ თამაშებში მონაწილეობის გამო ზუგდიდის “დინამოს” და თბილისის “შევარდენ 1906-ს” სასჯელი დაეკისრათ.

კერძოდ, ზუგდიდის “დინამო” მოხსნილია 2022 წლის ეროვნული ლიგა 2-ის გათამაშებიდან და დაქვეითდა ერთი საფეხურით დაბალ დივიზიონში; ასევე დისკვალიფიცირებულია 2022 წლის დავით ყიფიანის სახელობის თასის გათამაშებიდან; დაჯარიმდა ფულადი ჯარიმით 10 000 ლარის ოდენობით.

გარდა ამისა, “დინამოს” ფეხბურთელებს, ნიკა აფხაზავას, ნიკოლოზ ბერიშვილს და ავთო ენდელაძეს აეკრძალათ ფეხბურთთან დაკავშირებული საქმიანობა 12 თვის ვადით. ხოლო სერგეი დიაჩუკს, ნიკოლოზ ხარაბაძეს, არველოდ ხუნჯგურუას და როინ ჩხაიძეს აეკრძალათ ფეხბურთთან დაკავშირებული საქმიანობა 6 თვის ვადით (ვადის მოქმედება წყდება ნებისმიერი საჩემპიონატო ინტერვალით – სეზონებს შუა ან შესვენების პერიოდებში.

ფულადი ჯარიმა დაეკისრათ ფეხბურთელებს: ნიკა აფხაზავას – 5 000 ლარი; ნიკოლოზ ბერიშვილსა და ავთო ენდელაძეს – 3 500 ლარი; სერგეი დიაჩუკს, ნიკოლოზ ხარაბაძეს, არველოდ ხუნჯგურუასა და როინ ჩხაიძეს – 2 000 ლარი.

ანალოგიური გადაწყვეტილება იქნა მიღებული თბილისის “შევარდენ 1906-ის” მიმართაც.

სადისციპლინო და დავების განმხილველი კომიტეტის განცხადების თანახმად, გადაწყვეტლების მიღებამდე სადისციპლინო კომიტეტი უეფას თაღლითური ფსონების ამოცნობის ანგარიშს, მხარეთა ახსნა-განმარტებებს, და მატჩებში საეჭვო ეპიზოდების ვიდეო ჩანაწერს გაეცნო.

კომიტეტის გადაწყვეტილება ძალაში შედის მისი მიღების მომენტიდან. გადაწყვეტილების გასაჩივრება შესაძლებელია საფეხბურთო დავების განმხილველ ტრიბუნალში მისი მხარისათვის ჩაბარებიდან 7 კალენდარული დღის ვადაში.

კომიტეტის გადაწყვეტილების მოქმედება ჩერდება მხოლოდ ტრიბუნალის მიერ მიღებული გადაწყვეტილების საფუძველზე. განსაზღვრულ ვადაში გადაწყვეტილების არგასაჩივრების შემთხვევაში იგი უნდა აღსრულდეს დაუყოვნებლივ.

ზუგდიდის “დინამომ” 22 მაისს გამართა ბოლო შეხვედრა თბილისში “ვიტ ჯორჯიასთან”. მატჩი ფრედ, 3:3 დასრულდა. ზუგდიდურ კლუბს 16 ქულა ჰქონდა და ეროვნულ ლიგა 2-ში მე-6 ადგილზე იყო.