დაავადებათა კონტროლის ეროვნული ცენტრის ხელმძღვანელი ამირან გამყრელიძე ოზურგეთში იმყოფებოდა. ადგილობრივი ხელისუფლების შემდეგ ის სკოლებისა და ბაღების თანამშრომლებს შეხვდა.
გამყრელიძემ ქვეყანაში შექმნილ მძიმე ეპიდვითარებაზე, ვაქცინაციის მაუცილებლობასა და ამ კონტექსტში სააღმზრდელო დაწესებულებების თანამშრომლების იმუნიზაციის მნიშვნელობაზე ისაუბრა და განაცხადა, რომ განათლების სფეროში დასაქმებული ადამიანების აცრა უკიდურესად მნიშვნელოვანია. გამყრელიძისვე განცხადებით, ქვეყნის მასშტაბით სამოდელო მუნიციპალიტეტებად გურჯაანი და ოზურგეთი იქნა შერჩეული, სადაც მძლავრი საკომუნიკაციო კამპანია მიმდინარეობს.
ამირან გამყრელიძემ მადლობა გადაუხადა რესურსცენტრსა და სკოლამდელი აღზრდის დაწესებულებების გაერთიანებას ვაქცინაციის მაღალი მაჩვენებლისა და უსაფრთხო გარემოს შექმნისთვის და დღევანდელ შეხვედრაზე იმუნიზაციის მაღალი მაჩვენებლის გამო 7 საჯარო სკოლისა და 4 საბავშვო ბაღის ხელმძღვანელი, სპეციალური სიგელებით დააჯილდოვა.
Loading ...
