რეგიონების წმენდა გახარიას კადრებისგან გრძელდება – ცოტა ხნის წინ, ცნობილი გახდა, რომ თანამდებობიდან გაათავისუფლეს სამეგრელო-ზემო სვანეთის სამხარეო ადმინისტრაციის უფროსი.
როგორც ლაშა გვასალია ამბობს, გადაწყვეტილება გუბერნატორმა შეატყობინა, თუმცა გვასალია ამ ეტაპზე არ ადასტურებს, რომ გიორგი გახარიას გუნდთან ერთად აპირებს პოლიტიკური საქმიანობის გაგრძელებას.
“2012 წელს მე ბიძინა ივანიშვილმა გამომიშვა სამეგრელოში პარტიის გასაძლიერებლად და საქმეების გასაკეთებლად. ერთადერთი ადამიანი, ვისაც მე ცუდად არასდროს შევეხები, ეს ივანიშვილია, სხვები მომექცნენ აბსოლოტურად უსამართლოდ, გაოგნებული ვარ, ასეთი რაღაცეები არ უნდა ხდებოდეს. მე გახარიას მეგობარი ვარ და ალბათ ამიტომ მიშვებენ სამსახურიდან, ვიღაცას ეს ჩაფიქრებული ჰქონდა, ჩემი მოშორება უნდოდათ სამსახურიდან”- ამბობს გვასალია.
გვასალია ფიქრობს, რომ მისი გათავისუფლების ბრძანება გუბერნატორმა პარტიის ხელმძღვანელობისგან მიიღო. ლაშა გვასალია ბოლო არჩევნების დროს, “ქართული ოცნების” საარჩევნო შტაბს ხელმძღვანელობდა.
დღეს ამავე მიზეზით, (გახარიას გუნდის წევრობა), თანამდებობების დატოვება მოსთოვეს გორის, ხაშურის, სენაკის ფოთის მერების მოადგილეებს.