მოჰყვება თუ არა შეზღუდვების გამკაცრება კორონავირუსის შემთხვევების ზრდას, ეს ჯერჯერობით უცნობია, თუმცა სპეციალისტები თანხმდებიან, რომ ქვეყანა პანდემიის მესამე ტალღის ეტაპზეა და შესაძლოა საჭირო გახდეს სხვადასხვა რეგულაციების გამკაცრება.
ალერგოლოგ-იმუნოლოგი ბიძინა კულუმბეგოვი მიიჩნევს, რომ საქართველოში COVID-19-ის შიდა საზოგადოებრივი გავრცელება მიმდინარეობს და ვერც ვაქცინაციის პროცესია ისეთი წარმატებული, რომ ვირუსის გავრცელების ტალღაზე გავლენა მოახდინოს. როგორც ბიძინა კულუმბეგოვი „კურიერთან” აცხადებს, თუ ადამიანები ამას მაღალი შეგნებით არ მოეკიდებიან, მესამე ტალღა გარდაუვალია.
„რეპროდუქციული მაჩვენებელი 1-ზე ზემოთ არის, ანუ საქართველოში ხდება შიდა საზოგადოებრივი გავრცელება.
შესაბამისად, შემაკავებელი ღონისძიებები ამ დროს არის მხოლოდ და მხოლოდ პირბადე, დისტანციის დაცვა, ვაქცინაციის პროცესი და მობილობის შეზღუდვა. ჩვენ ახლა ამ შემთხვევაში რეალურად მობილობა შეზღუდული არ გვაქვს. ძალიან ნაადრევად, მე ასე მიმაჩნია, რომ იქნა მოხსნილი ეს ყველაფერი.
მეორეს მხრივ ვაქცინაცია ვერ არის ისეთი წარმატებული, რომელსაც ტალღაზე შეიძლება რაიმე გავლენა ჰქონდეს. რეალურად დავრჩით პირბადის ამარა.
თუ ამას ადამიანები ძალიან მაღალი შეგნებით არ მოეკიდებიან და კიდევ ერთხელ უნდა ვთხოვო ჩვენს მოსახლეობას, მაშინ რეალურად ეს მესამე ტალღა არის გარდაუვალი,” – განაცხადა ბიძინა კულუმბეგოვმა.
Loading ...