დღეს პარლამენტთან ანტირუსულ აქციაზე დაკავებულების ნაწილი დიღმის წინასწარი მოთავსების იზოლატორში გადაიყვანეს. ადვოკატები ამბობენ, რომ რამდენიმე მათგანი ნაცემია, აღენიშნებათ ფიზიკური დაზიანებები, სჭირდებათ ექიმის დახმარება.
უფლებადამცველების თქმით, დღეს დაკავებული 20 პირიდან ჯერ ყველა არ გადაუყვანიათ იზოლატორებში და მათი ძებნა უწევთ.
“სამწუხაროდ, ამ დრომდე არ მომხდარა ყველა დაკავებულის შესახლება, დაკავებულები ჰყავთ ისევ მანქანაში გაჩერებული რომ ვნახოთ ყველა და გავიგოთ მათი მდგომარეობა, უნდა აღინიშნოს, რომ შევხვდი უკვე ორ დაკავებულს და ორივე არის ფიზიკური დაზიანების მსხვერპლი, ორივეს აქვს დაზიანებები, ერთი დაკავებული გადაჰყავთ სასწრაფო სამედიცინო დახმარებით, სჭირდება მას სამედიცინო დაწესებულებაში გადაყვანა. დაკავებულებს აღენიშნებათ დაზიანებები, აქვთ ტკივილები სხეულის სხვადასხვა არეში”, – ამბობს ადვოკატი ეკა ქობესაშვილი.
დაკავებულის, გიორგი მენთეშაშვილის ადვოკატი, მარიამ პატარიძე ამბობს, რომ ჭიჭინაძისა და ზუბალაშვილების ქუჩის კვეთაზე მისი დაცვის ქვეშ მყოფი შეითრიეს სამართალდამცავებმა და მუშტებს თავში ურტყამდნენ – “რამდენიმე ადგილზე, ზედაპირულად, რაც ჩემთვისაც კი აღქმადი იყო, გატეხილი აქვს თავი, სისხლის კვალიც აღენიშნება სხეულზე”.
ადვოკატმა მოინახულა გურამ ადამიაც, რომელსაც ასევე სცემეს, მას კლინიკაში გადაყვანა სჭირდება:
„მრავლობითი დაზიანება აქვს, თვალის მიდამოებში დიდი ჭრილობა აღენიშნება, ასევე დაზიანებები აქვს კისრის მიდამოშიც. მას სპეცრაზმის თანამშრომლები ურტყამდნენ, წაქცეულზე სხვადასხვა პოლიციელებმა ფეხზე გადაუარეს. ეს ადამიანი უკანონოდ დააკავეს, ახლა იზოლატორშია, ცუდადაა, ექიმს ვითხოვთ. იზოლატორმა სასწრაფო უნდა გამოიძახოს და საავადმყოფოში გადაიყვანონ, ამ მომენტისთვის, აღნიშნული არ ხდება, უკან უნდა შევიდე და დაშავებულის კლინიკაში გადაყვანა მოვითხოვო. ადამიანი, რომელსაც მრავლობითი დაზიანებები აქვს, რომელსაც ფიზიკურად გაუსწორდნენ, ითხოვს კვლევებზე გადაიყვანონ, თავის ტვინი აქვს გადასაღები, ძალიან ბევრი სისხლი დაკარგა, ამბობს, რომ პირის ღრუ სისხლით ჰქონდა სულ ამოვსებული, ცხვირიდანაც ბევრი სისხლი სდიოდა, ის აუცილებლად საჭიროებს კლინიკაში გადაყვანას“, – აცხადებს ტყეშელაძე. –
Loading ...