75 წლის იაპონელი მოხალისე ფუმინორი ცუჩიკო უკრაინაში შარშან, ომის დროს ჩავიდა. როცა ხარკოვი გამუდმებით იბომბებოდა, ის ქალაქის მცხოვრებლებთან ერთად იმალებოდა მეტროსადგურში. აქ გაიცნო მან უკრაინელი მოხალისე ნატალია გრამა და მასთან და სხვა მოხალისეებთან ერთად ხარკოველებს საკვებით, მედიკამენტებითა და ჰიგიენური საშუალებებით ამარაგებდა.
ცოტა ხნის წინ იაპონელმა მოხალისემ ხარკოვში პატარა, უფასო კაფე გახსნა, FuMi Caffe, რომელიც კვირაში 7 დღე ცხელ კერძს სთავაზობს მათ, ვისაც ამის საშუალება არ აქვს. მასთან ერთად მუშაობს ნატალიაც, რომლის ქმარიც უკრაინის შეიარაღებულ ძალებშია და ამჟამად ბახმუტის დასაცავად იბრძვის.
ბოლო დღეებია იაპონელი მოხალისის უფასო კაფე ხარკოვში უკრაინული და მსოფლიო მედიის ყურადღების ცენტრში მოექცა.
„ომის დროს ბევრმა ადამიანმა დაკარგა სახლი და სამუშაო. ყველა ქარხანა, ყველა ოფისი განადგურებულია. თუ ხალხს ფული არ ექნება, მშიერი დარჩება. გვინდა, დღეში ერთხელ მაინც მივაწოდოთ მათ საკვები. მინდა ხალხმა გაიღიმოს, ბავშვებმა გაიღიმონ“ – უთხრა იაპონელმა მოხალისემ lyuk.media-ს.
კაფე ყოველდღიურად 500-მდე ადამიანს უმასპინძლდება ცხელი საკვებით და ძირითადად იაპონელი ხალხის შემოწირულებებით ფინანსდება.
იაპონელი მოხალისე სამუდამოდ უკრაინაში გეგმავს დარჩენას. მას მეუღლე 15 წლის წინ გარდაეცვალა, სახლი იაპონიაში უკვე გაყიდა, თანხის ნაწილი შვილებს გაუნაწილა და ამბობს, რომ ხარკოვიდან წასვლას არ აპირებს.
Loading ...