700-მდე პირია გათავისუფლებული საჯარო სამსახურიდან იმის გამო, რომ მხარი დაუჭირეს ევროინტეგრაციის პროცესს – სამხარაძე

საჯარო მოსამსახურეთა დამოუკიდებელი პროფესიული კავშირის „კონსტიტუციის 78-ე მუხლის“ თავმჯდომარის, კახი სამხარაძის განცხადებით, დღეის მდგომარეობით, საჯარო სამსახურიდან 700-მდე პირია გათავისუფლებული იმის გამო, რომ მხარი დაუჭირეს ევროინტეგრაციის პროცესს. ამის შესახებ მან ბრიფინგზე განაცხადა.

„ჩვენ ვაკვირდებით მიმდინარე პროცესებს. დღეის მდგომარეობით, 700-მდე ადამიანი არის გათავისუფლებული საჯარო სამსახურიდან იმის გამო, რომ მათ მხარი დაუჭირეს ევროინტეგრაციის პროცესს. 150-მდე ადამიანმა მომართა ჩვენს პროფესიულ კავშირს უფლებების დასაცავად, ასევე სხვაგვარი ბენეფიტების მისაღებად.

ბუნებრივია, ამ ეტაპზე რა მონაცემიც გვაქვს, 700 ადამიანია გაშვებული, თუმცა სტატისტიკა კიდევ უფრო მზარდია. მიმდინარე კვირას გაცხადდა, რომ საქართველოს პარლამენტში დაიწყო რეორგანიზაციის პროცესი, საქართველოს პარლამენტში დღესდღეობით ეს პროცესი რეორგანიზაციაზე უკავშირდება მუდმივად აპარატს, მუდმივ სტაფს, რომელშიც მოიაზრება სხვადასხვა დეპარტამენტი, მათ შორის საორგანიზაციო, იურიდიული, ადამიანური რესურსების თუ სხვა დეპარტამენტი.

ეს ადამიანები, დღემდე ღიად არ აფიქსირებდნენ პოზიციას, მაგრამ მიუხედავად ამისა, სისტემამ მათაც მიაკითხა. მათ მიმართაც დაიწყო რეპრესიები, შევიწროება იქიდან გამომდინარე, რომ ყველამ იცის თითოეული იმ ადამიანის განწყობა საჯარო სამსახურში. ეს კიდევ ერთი სიგნალია იმის, რომ ეს რეპრესიები ყველა საჯარო მოხელემდე მივა. შესაბამისად, სჯობს, თავის დროზე დააფიქსირონ ღიად პოზიცია, რათა შემდგომში უფრო მარტივი იყოს მათი უფლებების დაცვა“, – თქვა კახა სამხარაძემ.

მისივე თქმით, საჯარო მოსამსახურეთა პროფესიულმა კავშირმა საკონსტიტუციო სასამართლოს მიმართ „საჯარო სამსახურის შესახებ“ კანონის არაკონსტიტუციურად ცნობის მოთხოვნით. როგორც სამხარაძემ აღნიშნა, სარჩელი მიმდინარე კვირას დარეგისტრირდა.

„ასევე, ჩვენ მივმართეთ სასამართლოს, საჯარო სამსახურის შესახებ კანონის არაკონსტიტუციურად ცნობის შესახებ და მიმდინარე კვირაში ეს სარჩელი საკონსტიტუციო სასამართლოში დარეგისტრირდა. ბუნებრივია, ჩვენ ვერ გვექნება მოლოდინი ამ საკონსტიტუციო სასამართლოსგან მითუმეტეს, მიმდინარე მოვლენების გათვალისწინებით, რომ სასამართლო იქნება თავის სიმაღლეზე და მიიღებს შესაბამის გადაწყვეტილებას, თუმცა ეს არის აუცილებელი პირობა, რომ ამოვწუროთ შიდა სახელმწიფოებრივი მექანიზმები და შემდგომში უფლების დაცვა გავაგრძელოთ საერთაშორისო მექანიზმების გამოყენებით“, – თქვა მან.

კახი სამხარაძემ ასევე თავისუფალ ბიზნესს გათავისუფლებული საჯარო მოხელეების მხარდაჭერისკენ და დასაქმებისა და გადამზადების კამპანიებში ჩართვისკენ მოუწოდა. მანვე აღნიშნა, რომ იმ საჯარო მოხელეებისთვის, რომლებმაც მათი პირადი ინტერესები სახელმწიფო და საზოგადოებრივი ინტერესებისთვის გადაწიეს უკანა პლანზე, სოლიდარობა ძალიან მნიშვნელოვანია.

წყარო: publika.ge