7 წლის უკრაინელი გოგო, ნასტია ბურიუკი, რომელიც ისრაელში ავთვისებიანი სიმსივნის სამკურნალოდ ჩავიდა, ირანული საჰაერო იერიშის შედეგად საკუთარი ოჯახის წევრებთან ერთად დაიღუპა.
ბურიუკი 13 ივნისს ირანის საჰაერო იერიშის დროს დედამისთან, ბებიამისთან და ორ ძმასთან ერთად ბათ-იამში საცხოვრებელ ბინაში იმყოფებოდა – იერიშის შედეგად ყველანი დაიღუპნენ.
დაღუპული გოგოს მამა, არტიომი, კიევში იმყოფება და რუსეთის წინააღმდეგ იბრძვის.
ნასტია ბურიუკს 2022 წელს ლიმფობლასტური ლეიკემიის დიაგნოზი დაუსვეს, რომელიც სისხლსა და ძვლის ტვინზე მოქმედებს. ბურიუკს უკრაინაში ქიმიოთერაპია ჩაუტარდა, რის შედეგაც მისი მდგომარეობა თავდაპირველად გაუმჯობესდა, თუმცა მოგვიანებით სიმსივნემ რეციდივი განიცადა.
ჯანმრთელობის გაუარესებასთან ერთად ბურიუკის ოჯახი საქველმოქმედო შემოწირულობების დაფინანსებით გოგოს სამკურნალოდ ისრაელში ჩავიდა, სადაც მას ძვლის ტვინი გადაუნერგეს.
ოპერაცია წარუმატებელი აღმოჩნდა და ბურიუკს ლეიკემია შეუბრუნდა. მიმდინარე წლის დასაწყისში ოჯახი ისრაელში გოგოს ხელახლა სამკურნალოდ დაბრუნდა. ოჯახს სწამდა, რომ რუსული იერიშების გამო ისრაელში ოდესაზე უფრო უსაფრთხოდ იქნებოდნენ.
ნასტია ბურიუკის ორი ძმა, 9 წლის კონსტანტინი და 13 წლის ილია, ადგილობრივ სკოლაში სწავლობდნენ.
Loading ...