ფინანსური მდგომარეობა მხოლოდ იმაში არ გამოიხატება, თუ რამდენი გაქვს თანხა საბანკო ანგარიშზე. ფინანსური მდგომარეობა ყველაზე მეტად ჩანს ჩვენს ყოველდღიურ არჩევანში, შესაძლებლობებში და იმაში, თუ როგორ ვგრძნობთ თავს ყოველდღიურ ცხოვრებაში.
ეს ნიშნები დაგეხმარება, ცოტა უკეთ ჩაწვდე საკუთარ ფინანსებს და მიხვდე, ღარიბად ითვლები თუ საშუალო ფენის წარმომადგენელი ხარ.
1. ხელფასი ირიცხება, მაგრამ მალევე ქრება
საშუალო ფენა ცდილობს თვეში შემოსავალი გადაანაწილოს. ნაწილი ყოველდღიური ხარჯებისთვის გამოიყენოს, ნაწილი კი სამომავლო გეგმებისთვის გადადოს და დაზოგოს.
ღარიბისთვის კი ხელფასი თითქმის ყოველთვის ქრება სადღაც სახელფასო თვის შუაში — კომუნალურებზე, საკვებზე, საჭირო ნივთებზე. თითქოს ხელფასი იმისთვის არის, რომ უბრალოდ ამ თვეში გადარჩე. მერე კი იწყება მომდევნო თვის ხელფასის ლოდინი. ეს მუდმივი წრე ადამიანში სტრესს აჩენს და არჩევანის თავისუფლებას აკარგვინებს.
2. შვებულება — რეალობა თუ ოცნება
საშუალო ფენა გეგმავს შვებულებას: აგვისტოში ზღვაზე, ზამთარში – თბილ ქვეყნებში, ან ახერხებს, სულ მცირე, დასვენების დღეებში ქალაქიდან გამოსვლას. შვებულება მათთვის რეალური, გაწერილი ნაბიჯებით დაწყობილი გეგმაა.
ღარიბისთვის კი შვებულება ხშირად ოჯახური საქმეების გაკეთების შესაძლებლობაა. მაქსიმუმ შესაძლებელი იყოს სახლში თავისუფლად ყოფნა, ნათესავებთან ჩასვლა ან იაფი ბილეთის მოძებნა, რომელსაც ლამის ერთი წლით ადრე ყიდულობ, რომ მაქსიმალურად დაბალი ფასის იყოს.
3. საოჯახო ტექნიკა
საშუალო ფენა საკმაოდ სტაბილური ტექნიკით ცხოვრობს: ტელევიზორი, მობილური, კომპიუტერი ჩვეულებრივ მუშაობს, გამართულია და პრობლემებს არ ქმნის.
ღარიბის ტექნიკა ხშირად მოძველებული ან მწყობრიდან გამოსულია. მობილურის ეკრანი ან დამცავი ”ბრონი” გატეხილია, ლეპტოპი ცხელდება. მუდმივი რემონტი, დროის და ენერგიის დახარჯვა ყოველდღიურობაში — ეს დამატებით სტრესს აჩენს და ახალ შესაძლებლობებს კეტავს.
4. კრედიტები — დიდი მიზნისთვის თუ უბრალოდ გადარჩენისათვის?
საშუალო ფენა იღებს კრედიტს კონკრეტული მიზნებისთვის: ახალი ბინა, მანქანა, საკუთარი განათლება ან ბიზნესის განვითარება. ეს კრედიტი ხელს უწყობს მომავალში მათი ცხოვრების ხარისხის გაუმჯობესებას.
ღარიბისთვის კი კრედიტი ხშირად მხოლოდ გადარჩენის საშუალებაა, იმისთვის, რომ საკვების პრობლემა მოხსნას, კომუნალური გადაიხადოს ან ბავშვისთვის აუცილებელი ნივთები იყიდოს.
საშუალო ფენისთვის კრედიტი ცხოვრების გაუმჯობესების და მომავლის დაგეგმვის შესაძლებლობაა, ღარიბისთვის კი უბრალოდ გადარჩენა მცირე დროით.
5. ტანსაცმელი და გარეგნობა
საშუალო ფენა ატარებს იმას, რაც მოსწონს, უხდება და კომფორტულია. ტანსაცმელი მათთვის თვითგამოხატვის, სიმშვიდისა და იდენტობის ნაწილია.
ღარიბის ახალი ფეხსაცმელი ან პიჯაკი მხოლოდ მომავლისთვის ინახება. ყოველ დილით გარდერობთან დგომა და ფიქრი, თუ რა უნდა ჩაიცვას, ყოველდღიურობის ნაწილია. ღარიბი ვერ ახერხებს, ის ტანსაცმელი იყიდოს, რაც მოსწონს, რაც თვითგამოხატვის საშუალებას მისცემს. ღარიბი ყიდულობს, რაც იაფია, ფასდაკლებითაა ან მეორადია.
6. ოჯახში ეკონომიკური სტაბილურობა
საშუალო ფენას ხშირად შეუძლია ოჯახს მინიმალური სტაბილურობა შეუქმნას: შვილებს განათლება მისცეს, კარგი საოჯახო დაზღვევა ჰქონდეს ანაბარი გახსნას მომავალი ხარჯებისთვის.
ღარიბის ოჯახი კი მუდმივ ფინანსურ დაძაბულობაში ცხოვრობს — ყოველდღიური გადარჩენა პირველ ადგილზეა,
7. გრძელვადიანი გეგმები
საშუალო ფენა ფიქრობს გრძელვადიანად: ახერხებს, საკუთარი მომავალი დაინახოს 3–5 წლის ან უფრო მეტ დროის მერე. გეგმავს დაზოგვას, ინვესტიციებს, განათლებას. მისთვის მომავალი პროგნოზირებადი და მშვიდია.
ღარიბისთვის კი არა თუ სამი წლის შემდგომი მომავალი, მომდევნო ერთი წელიც გაურკვეველი და ბურუსითაა მოცული. ღარიბს უჭირს სამომავლო გეგმების დაწყობა, რადგან არ იცის, როგორი სამსახური და როგორი შემოსავალი ექნება. ის ცდილობს არ დაკარგოს ის სამსახური რაც აქვს, გადაიხადოს კრედიტის მინიმალური შესატანი და გამოკვებოს ოჯახი.
საშუალო ფენა არ ნიშნავს მდიდრობას, მაგრამ საშუალო ფენის ადამიანებს აქვთ არჩევანის თავისუფლება და სტაბილურობა; ღარიბი კი მუდმივ კრიზისშია — ყოველდღიურ გადარჩენაზე ფიქრობს და მომავალზე ფიქრის საშუალება არ ეძლევა. შესაბამისად, არა აქვს სულიერი სიმშვიდე და ჰარმონია.
Loading ...