”სახელმწიფოს ყველაზე სწორი მოწყობა არის, როცა უმრავლესობა არ ჩარგავს უმცირესობას, იმიტომ რომ ის უმცირესობაა. როცა უმრავლესობისთვის ინდივიდის, ერთი ადამიანის ინტერესი არის ღირებული და გასათვალისწინებელი. ეს ღირებულებები კი დასავლეთთან ასოცირდება. ამიტომ ჩვენ საკუთარ თავს უნდა მივანიჭოთ მეტი ფასი და უნდა შევთანხმდეთ მინიმალურ სტანდარტებზე: არ ვკლავთ ერთმანეთს, არ ვდევნით განსხვავებულ აზრს და პატივს ვცემთ ერთმანეთს. ჩვენ უნდა შევქმნათ ჰარმონიული გარემო, სადაც ყველანი თანასწორები ვიქნებით და გეზი გვექნება ცივილიზებული სამყაროსკენ და არა ჩვენი ორასწლიანი მტრის, ჩვენი დამანგრეველი რუსეთის იმპერიისკენ.” – ამბობს კუკური ბარამიძე, რომელიც პროფესიით იურისტია და ამჟამად სამოქალაქო აქტივიზმშია ჩართული.
კუკური ბარამიძე საჯარო სამსახურში არაერთი წელი მუშაობდა. თუმცა ერთი წლის წინ ის სამსახურიდან დაითხოვეს. როგორც თვითონ ამბობს, მისი გათავისუფლება პირდაპირ უკავშირდება სამოქალაქო აქტივიზმს და პროტესტს, რომელსაც ხელისუფლების მიმართ ღიად გამოხატავდა. ამჟამად ოზურგეთის მუნიციპალიტეტის მერიასთან სამართლებრივ დავაში იმყოფება და საქმის მოგების იმედი აქვს. ეს სამსახურიდან მისი გათავისუფლების უკვე მეორე შემთხვევაა. პირველად ის ოზურგეთის მუნიციპალიტეტის მერიიდან წინა მერის დროს დაითხოვეს, თუმცა საქმე ყველა სასამართლო ინსტანციაში მოიგო და სამსახურში დაბრუნდა. იგივე მოლოდინი აქვს ამჯერადაც, რადგან თვლის, რომ მისი გათავისუფლება უკანონოდ, პირადი შეხედულებების საფუძველზე მოხდა.
ხშირად მონაწილეობს სხვადასხვა საპროტესტო აქციასა და აქტივობებში. ის და მისი მეგობრები არიან ყველგან, სადაც საქართველოსთვის და მისი ევროპული მომავლისთვის მნიშვნელოვანი სამოქალაქო ღონისძიება ხორციელდება.
ამჟამად კუკური ბარამიძე სამოქალაქო მოძრაობა ”თავისუფლებისთვის” დამფუძნებელი წევრია. მოძრაობა საზოგადოებისთვის მნიშვნელოვან და აქტუალურ საკითხებზე მუშაობს, აპროტესტებს პრორუსული ძალების საქმიანობას საქართველოში და პოპულარიზაციას დასავლურ ღირებულებებსა და ევროინტეგრაციის აუცილებლობას უწევს.
ეს მასალა შექმნილია კამპანია „ეს ქვეყანა შენიას“ ფარგლებში, რომელსაც ახორციელებს სამოქალაქო საზოგადოების ინსტიტუტი ევროკავშირისა და კონრად ადენაუერის ფონდის მხარდაჭერით. მის შინაარსზე სრულად პასუხისმგებელია გურიაTV და შესაძლოა, რომ იგი არ გამოხატავდეს სამოქალაქო საზოგადოების ინსტიტუტის, ევროკავშირისა და კონრად ადენაუერის ფონდის შეხედულებებს.
Loading ...
