მთავრობა 6 წელზე მეტი წლოვანების ასაკის ავტომობილების იმპორტის აკრძალვას გეგმავს. შესაბამისი კანონპროექტი პარლამენტში უკვე ინიციირებულია. ამის შესახებ ირაკლი კობახიძემ მთავრობის სხდომის დაწყებამდე განაცხადა და განმარტა, რატომ გახდა საჭირო აღნიშნული შეზღუდვის დაწესება.
მისი ინფორმაციით, კანონპროექტი შინაგან საქმეთა სამინისტრომ მოამზადა.
„საქართველოში, ბოლო წლებში ავტოსატრანსპორტო საშუალებების იმპორტი მნიშვნელოვნად გაზრდილია. 2012 წელს საქართველოში 864 000 ავტომობილი იყო რეგისტრირებული და წლევანდელი მონაცემებით ამ მაჩვენებელმა 2 მილიონს გადააჭარბა – ხედავთ, რა მასშტაბის ზრდაზეა საუბარი. ავტომობილების რაოდენობის ასეთი ზრდა იწვევს, ერთი მხრივ, საგზაო მოძრაობის გადატვირთვას და მეორე მხრივ, ეკოლოგიური მდგომარეობის გაუარესებას, შესაბამისად, ვფიქრობ, აქაც ძალიან მნიშვნელოვანი ზომების მიღებაა აუცილებელი.
ამისათვის პარლამენტში წარვადგინეთ კანონპროექტი, რომელიც ითვალისწინებს 6 წელზე მეტი წლოვანების ავტომობილების შემოყვანაზე აკრძალვის დაწესებას, რა თქმა უნდა, მცირე გამონაკლისები გათვალისწინებული იქნება. თუმცა, ვფიქრობთ, რომ არსებითად მნიშვნელოვანია 6 წელზე მეტი წლოვანების ავტომობილები არ იყოს შემოყვანილი ქვეყანაში. ეს მნიშვნელოვანია ეკოლოგიისთვის, ადამიანის ჯანმრთელობისა და კომფორტული გადაადგილებისთვის. მადლობა მინდა გადავუხადო შს მინისტრს მომზადებული კანონპროექტისთვის“, – განაცხადა ირაკლი კობახიძემ.
Loading ...