დაახლოებით 500 რუსი სამხედრო, რომლებიც უკრაინაში საომრად არიან მობილიზებული, ვიდეოს ავრცელებს, სადაც ისინი ჰყვებიან „ცხოველურ პირობებზე,“ რომლებშიც მათ ამყოფებენ რუსეთის ტერიტორიაზე.
ვიდეო გავრცელდა სოციალური ქსელებით 5 ოქტომბრის ღამით. რადიო თავისუფლების რუსული სამსახურის ცნობით, პირი, ვინც მას იღებს დგას ადამიანების დიდი ჯგუფის წინ. ეს არიან სამხედროები იარაღით ხელში, რომლებიც ჰყვებიან, რომ მატარებლიდან ჩამოვიდნენ ბელგოროდთან. მობილიზებულები კამერის წინ ლაპარაკობენ, რომ ისინი არ არიან მიმაგრებული არცერთ სამხედრო ნაწილზე, არ იციან, რისთვის და სად გააგზავნეს, ჭამენ იმას, რასაც თვითონ ყიდულობენ, ფულის დიდი ნაწილი ამისთვის დახარჯეს.
ვიდეოს გადაღების ზუსტი ადგილი და დრო ჯერ დადგენილი არ არის. რადიო თავისუფლების ჟურნალისტმა, მარკ კრუტოვმა ვიდეოს შესწავლისას შეამჩნია, რომ ერთ-ერთი ჯარისკაცი ადრეც გამოჩნდა სხვა ვიდეოში, სადაც ის უჩიოდა პირობებს, მაგრამ ის სხვა ადგილას იყო გადაღებული. გარდა ამისა, ჟურნალისტის თქმით, კადრები ბელგოროდის მახლობლად გადაიღო მოსკოველმა სერგეი სურკოვმა, რომელსაც ასევე ჰქონდა გადაღებული ვიდეო ჯარში არსებული პრობლემების შესახებ დაახლოებით ერთი კვირის წინ.
მობილიზებულთა რიგებში ჩანს კერძო სამხედრო კომპანიის, Wagner-ის სიმბოლიკის მქონე მამაკაცი. Wagner-ის ერთ-ერთი დამფუძნებელი და სპონსორია ვლადიმერ პუტინთან დაახლოებული ბიზნესმენი ევგენი პრიგოჟინი. ბოლო დროს პრიგოჟინი საჯაროდ და მკაცრად აკრიტიკებდა რუსეთის ფედერაციის თავდაცვის სამინისტროს – სავარაუდოდ, რომ კრემლის თანხმობით.
თადარიგის რუსი სამხედროები, რომლებიც შეკრებებზე ჩავიდნენ მას მერე, რაც ვლადიმირ პუტინმა გამოაცხადა „ნაწილობრივი მობილიზაცია,“ სულ უფრო ხშირად ჩივიან პირობების გამო, რომელშიც მათ უწევთ ყოფნა, ასევე აღჭურვილობის არქონის გამო, რაც საჭიროა საბრძოლო მოქმედებისთვის.
რადიო თავისუფლების რუსული სამსახურის ცნობით, ბევრ მობილიზებულს უწევს ყაზარმებში საწოლების გარეშე ძილი, არ არიან უზრუნველყოფილი სათანადო კვებით და არ გაუვლიათ სამედიცინო შემოწმება. ასეთი შემთხვევების შესახებ გავრცელდა ინფორმაცია ომსკის, ვოლგოგრადის, კიროვის, სვერდლოვსკის და სახალინის ოლქებიდან, ასევე ჩუვაშეთიდან და მოსკოვის ოლქიდან.
Loading ...
