90-იანები ოზურგეთშიც ისეთივე ბნელი და რთული იყო, როგორიც მთელ საქართველოში. მაგრამ ამ წლებიდან შემოგვრჩა არაერთი მოგონება, რომლების სასიამოვნოდ და სასაცილოდ გვახსენდება. ერთ-ერთი ასეთი მოვლენა იყო ტელესერიალები, რომლის ბუმი სწორედ 90-იანებში დაიწყო და მთელი საქართველო მოიცვა. ადამიანების განტვირთვის შეზღუდულ არჩევანში სერიალები იყო გამორჩეული შესაძლებლობა, რომელსაც ადამიანებისთვის სიამოვნება მოჰქონდა, სხვა სამყაროში მცხოვრები პერსონაჟების ცხოვრებაში ითრევდა და მცირე ხნით საკუთარ ყოველდღიურობას ავიწყებდა.
90-იანების სირთულეები გამოირჩევა მათ შორის ელექტროენერგიის შეზღუდული მიწოდებითაც. შუქი ფაქტობრივად მთელი დღის მანძილზე არ იყო, საღამოობით კი მოდიოდა დაბალი ძაბვის ელექტროენერგია, რომლის სრულყოფილად გამოყენება, მათ შორის ტელევიზორის ჩართვა შეუძლებელი იყო. ასეთი შემთხვევებისთვის ყველა უბანში მოიძებნებოდა ერთი-ორი ოჯახი, რომელსაც ელექტროენერგიის გამაძლიერებელი მოწყობილობა ჰქონდა, ან ფუფუნების საგნით – ელექტროგენერატორით გამოირჩეოდა ან სულაც ავტომობილი ჰყავდა და ავტომობილის აკუმულატორის დახმარებით შეეძლო ტელევიზორის ჩართვა.
სწორედ ეს ოჯახები იყო ის ადგილი, სადაც საღამოობით მეზობლები იკრიბებოდნენ და საყვარელი სერიალის დაწყებას ელოდებოდნენ. ისმოდა შეძახილები, პერსონაჟების გამამხნევებელი ფრაზები, სერიალის დრამატული მომენტის დროს ხშირად იყო ცრემლებიც. ქალები ყველაზე ჩართულები და ემოციურები იყვნენ ამ პროცესში, მამაკაცები თითქოს არ იმჩნევდნენ გულშემატკივრობას, მაგრამ მათაც ეტყობოდათ ხოლმე განცდები. ბავშვები კი მხიარულობდნენ, ერთმანეთის ნახვის საშუალება ეძლეოდათ და სერიალებსაც დაკვირვებით უყურებდნენ, რომ მეორე დღეს ახალი სერია გაეთამაშათ და პერსონაჟების როლები მოერგოთ.
ამ შეკრებების ერთ-ერთი გამორჩეული ნაწილი იყო ფეხსაცმელები. სერიალის ყურებისას აუცილებლად ნახავდით შემოსასვლელ კართან უამრავ, სხვადასხვა ზომის და ფორმის ფეხსაცმელს, რომელსაც მაყურებლები ოთახში შესვლის წინ იხდიდნენ. თუმცა სერიის დამთავრების შემდეგ დიდი ჟრიამული იყო სიბნელეში საკუთარი ფეხსაცმელის წყვილის საპოვნელად. ყოფილა შემთხვევები, როცა ადამიანები სახლში სხვისი ფეხსაცმლით წასულან 🙂
ჩვენ ვეცდებით, გავიხსენოთ ხუთი სერიალი, რომელიც უფროს და საშუალო ასაკის თაობის წარმომადგენლებს დღესაც ახსოვთ და რომლებმაც ბნელი 90-იანები შეძლებისდაგვარად შეგვიმსუბუქა.
„ველური გული“
ერთ-ერთი პირველი ტელესერიალი, რომელიც ჩვენტან მექსიკიდან შემოვიდა და მისმა პერსონაჟებმა ხუანმა და მონიკამ მაყურებლის გულები ერთბაშად დაიპყრო. მაშინ გოგონები მონიკას როლის შემსრულებელს ედიტ გონსალესს ბაძავდნენ, ბიჭებს კი ედუარდო პოლომო – ხუანის როლის შემსრულებელი მსახიობი მოსწონდათ. გამორჩეული იყო სერიალის მუსიკაც და სიუჟეტიც, სადაც როგორც ყოველთვის სიყვარულისა და ბოროტების ბრძოლის ამბავი იყო მოთხრობილი. აღსანიშნავია, რომ სამწუხაროდ დღეს არც ედიტ გონსალესი და არც ედუარდო პალომო ცოცხლები აღარ არიან. ხუანის როლის შემსრულებელი 2003 წელს რესტორანში გულის შეტევით გარდაიცვალა. ედიტ გონსალესი კი საკვერცხის კიბოთი 2019 წელს დაიღუპა.
„კასანდრა“
კასანდრა იყო ლეგენდა. ლამაზი ბოშა გოგონა, რომელიც შესანიშნავად ცეკვავდა და მამაკაცების გულებს იპყრობდა. სიუჟეტის მიმდინარეობისას აღმოჩნდა, რომ კასანდრა სულაც არ ყოფილა წარმოშობით ბოშა. შესაბამისად, მის ნამდვილ ოჯახში დაბრუნებას და სიყვარულის ისტორიას ყველა ოზურგეთელი გულშემატკივრობდა.
„დინასტია“
დინასტია უკვე სხვა პლანეტა იყო — ამერიკული სერილია, სადაც ყველაფერი სხვა გარემოში ხდებოდა. ჩვენგან განსხვავებით, ყველა მდიდარი იყო, ყველა გაპრანჭული, თუმცა ყველა ერთმანეთთან მტრობასა და დაპირისპირებაში გახლდათ. ქერინგტონების ოჯახის ისტორია ყველას გულს იპყრობდა. სხვათა შორის, ამ სერიალში იყო პირველი გეი მამაკაცი, რომელიც ოზურგეთისთვის ფაქტიურად შოკი იყო და მისი გულშემატკივრობა ლგბტ სტერეოტიპების გამო – მიუღებელი, თუმცა რახან აღნიშნული პერსონაჟი დადებითი იყო, ერთგვარი ფარული გულშემატკივრობა მაყურებელს მის მიმართ მაინც ჰქონდა. 🙂
„გვადალუპე“
ადელა ნორიეგა გახლდათ ვენესუელელი მსახიობი ქალი, რომლის პერსონაჟის გვადალუპეს ცხოვრების უიღბლო ისტორიას მთელი გულით განვიცდიდით. ღარიბი, კეთილი გოგონა საბოლოოდ მდიდარი ოჯახის შვილი აღმოჩნდა და ისევე როგორც ყველა ლათინოამერიკულ სერიალში, მის წინააღმდეგ მრავალი ინტრიგის ხლართვა დაიწყო. თუმცა საბოლოოდ, ოზურგეთელებმა გვადალუპეც მშვიდობით დავაბინავეთ საკუთარ მდიდარ და ბედნიერ ოჯახში მსახიობ ედუარდო იანესთან ერთად.
„იუდას ქალი“
ვენესუელური სერიალი, კრიმინალური ელემენტებით. მთელი სერიალის ინტრიგა იმაში მდგომარეობდა, გარკვეულიყო ვინ არის იუდას ქალი, რომელიც ადამიანებს კლავდა.
სერიალების ერთად ყურების ეპოქა დასრულდა. რეალურად მისი უკან დაბრუნება, უშუქობა და ძველი სირთულეები არავის გვენატრება, თუმცა ყველა ჩვენგანის წარსულის სიღრმეებში ინახება ასეთი საღამოები, სადაც სხვების ლამაზ, მდიდარ, თუმცა ტანჯვით და ტკივილით სავსე ცხოვრებას მეზობლებთან ერთად, საერთო გულშემატკივრობასა და თანაგრძნობაში ვუყურებდით და ყველას ერთად გვსურდა სხვა ადამიანების ცხოვრებაში ბედნიერი ფინალი დამდგარიყო.
Loading ...