5 შეწყალებული – ვინ რისთვის იყო მსჯავრდებული?

ქურდობა, თაღლითობა და საზღვრის უკანონო კვეთა – საქართველოს პრეზიდენტმა სალომე ზურაბიშვილმა სწორედ ამ დანაშაულებისთვის გასამართლებული პირები შეიწყალა 2020 წლის 6 იანვარს. 

საშობაოდ შეწყალებული 5 ადამიანიდან – 2 ქალია.

როგორც რადიო თავისუფლებას პრეზიდენტის ადმინისტრაციიდან აცნობეს, 2020 წლის 6 იანვარს შეწყალებულთაგან 3 მსჯავრდებული გათავისუფლდა პირობითად ჩათვლილი თავისუფლების აღკვეთის შემდგომი მოხდისგან. ხოლო 2 პირობით მსჯავრდებული – გათავისუფლდა პირობითად ჩათვლილი თავისუფლების აღკვეთის შემდგომი მოხდისგან.

შეწყალებული 2 ქალიდან ერთი – გათავისუფლდა თავისუფლების აღკვეთის, ხოლო მეორე – პირობითი მსჯავრის მოხდისგან.

ისინი მსჯავრდებულები იყვნენ საქართველოს სისხლის სამართლის კოდექსით გათვალისწინებული შემდეგი დანაშაულებისთვის:

2 პირი მსჯავრდებული იყო 177 მუხლის მე-2 და მე-3 ნაწილებით გათვალისწინებული დანაშაულით, რაც გულისხმობს ქურდობას,

ა) რამაც მნიშვნელოვანი ზიანი გამოიწვია;

ბ) ჩადენილი სადგომში ან სხვა საცავში უკანონო შეღწევით.

ეს დანაშაული ისჯება შინაპატიმრობით ვადით ერთიდან ორ წლამდე ან თავისუფლების აღკვეთით ვადით სამიდან ხუთ წლამდე.

ასევე: იგივე ქმედება, ჩადენილი:

ა) წინასწარი შეთანხმებით ჯგუფის მიერ;

ბ) არაერთგზის;

გ) ბინაში უკანონო შეღწევით;

დ) სატრანსპორტო საშუალების წინააღმდეგ,

ეს დანაშაული ისჯება თავისუფლების აღკვეთით ვადით ოთხიდან შვიდ წლამდე.

1 პირი მსჯავრდებული იყო 180-ე მუხლის მე-2 ნაწილით. რაც გულისხმობს თაღლითობას:

ა) ჩადენილი წინასწარი შეთანხმებით ჯგუფის მიერ;

ბ) რამაც მნიშვნელოვანი ზიანი გამოიწვია,

ისჯება ჯარიმით ან თავისუფლების აღკვეთით ვადით ოთხიდან შვიდ წლამდე.

3. იგივე ქმედება, ჩადენილი:

ა) სამსახურებრივი მდგომარეობის გამოყენებით;

ბ) დიდი ოდენობით;

გ) არაერთგზის.

ეს დანაშაული ისჯება ჯარიმით ან თავისუფლების აღკვეთით ვადით ექვსიდან ცხრა წლამდე.

რაც შეეხება პირობით მსჯავრდებულებს:

1 პირი გასამართლებული იყო 19-177 მუხლის მესამე ნაწილით, რაც გულისხმობს

ქურდობის მცდელობას:

ა) წინასწარი შეთანხმებით ჯგუფის მიერ;

ბ) არაერთგზის;

გ) ბინაში უკანონო შეღწევით;

დ) სატრანსპორტო საშუალების წინააღმდეგ,

დანაშაული ისჯება თავისუფლების აღკვეთით ვადით ოთხიდან შვიდ წლამდე.

და კიდევ ერთი პირი მსჯავრდებული იყო 344-ე მუხლის პირველი ნაწილით, რაც გულისხმობს საქართველოს სახელმწიფო საზღვრის უკანონოდ გადაკვეთას

ეს დანაშაული ისჯება ჯარიმით ან თავისუფლების აღკვეთით ვადით სამიდან ხუთ წლამდე.

სალომე ზურაბიშვილმა შეწყალების საკითხზე საგანგებო ბრიფინგი 6 იანვარს გამართა, რომლის დროსაც განაცხადა, რომ შეწყალების ახალი კრიტერიუმები მძიმე დანაშაულის მიმართ, როგორებიცაა: მკვლელობა, რეციდივი, ოჯახური ძალადობა, ძალადობა ბავშვზე, ნარკოტიკის შემოტანა-გასაღება – უფრო გამკაცრებულია, მსუბუქ დანაშაულებზე კი, პირიქით, შერბილებული:

„ეს კრიტერიუმები მე ჩემს თავს დავუწესე, რამეთუ კონსტიტუციის თანახმად, პრეზიდენტს კონსტიტუციით მინიჭებულ დისკრეციულ უფლებას სხვა ვერავინ შეუზღუდავდა“, – განმარტა მაშინ სალომე ზურაბიშვილმა.

საშობაო შეწყალებას წინ უსწრებდა სალომე ზურაბიშვილის მიერვე გამოცხადებული მორატორიული შეწყალებაზე – ეს გადაწყვეტილება მან მას შემდეგ მიიღო, რაც მისი წინა შეწყალების აქტები საზოგადოების მწვავე კრიტიკის საგანი გახდა, რადგან როგორც გაირკვა, ზურაბიშვილმა განსაკუთრებით მძიმე დანაშაულში მსგავრდებული პირები შეიწყალა.

 

www.radiotavisupleba.ge