5 საკითხი, რაზედაც “ოცნებასთან” მოლაპარაკებას აზრი აქვს – ვახტანგ ხმალაძის მოსაზრება

კონსტიტუციონალისტი ვახტანგ ხმალაძე სოციალურ ქსელში პოლიტიკური ვითარების განსამუხტად “ქართულ ოცნებასთან” მოლაპარაკების შესაძლო საკითხებს ასახელებს.

ხმალაძე მიიჩნევს, რომ პოლიტიკური კრიზისის დროს აზრს კარგავს საჯარო დიალოგი და დისკუსია ნებისმიერ საკითხზე, გარდა კრიზისის გამომწვევი მიზეზისა.

“ჩემს აზრს მოგახსენებთ. პოლიტიკური კრიზისის დროს აზრს კარგავს საჯარო დიალოგი და დისკუსია ნებისმიერ საკითხზე, გარდა კრიზისის გამომწვევი მიზეზისა (დრო ფუჭად დაიკარგება). ეს მიზეზია არალეგიტიმური არჩევნები. აზრი აქვს მხოლოდ მოლაპარაკებას ფაქტობრივ ხელისუფლებასთან შემდეგ საკითხებზე:

1. აქციებზე დაკავებულ პირთა გათავისუფლება და მათთვის წარდგენილი ბრალდების/ადმ. სამართალდარღვევის დაკისრების გაუქმება;
2. ხელახალი საპარლამენტო არჩევნების თარიღი;
3. ცენტრალური, საოლქო და საუბნო საარჩევნო კომისიების შემადგენლობა;
4. საარჩევნო დავების გადაწყვეტის დროებითი ალტერნატიული მექანიზმის შექმნა (სასამართლოსადმი ნდობა ნულოვანია) ან შეთანხმება კონკრეტულ მოსამართლეებზე, რომლებსაც დაეკისრებათ საარჩევნო დავების განხილვა;
5. არალეგიტიმურად არჩეული პრეზიდენტის ინაუგურაციის გაუქმება და პრეზიდენტის არჩევა პარლამენტის ხელახალი არჩევნების შემდეგ”, – წერს ხმალაძე.