5 მითი ზამთარში ბავშვების ჯანმრთელობაზე, რომლებსაც ხშირად შეცდომაში შევყავართ

იცავს თუ არა ვიტამინი C რესპირატორული ინფექციებისგან? შეიძლება თუ არა ბავშვი თოვლის ჭამისგან გაცივდეს? შეიძლება თუ არა სიცხიანი ბავშვის ცივ ამინდში გარეთ გასვლა? ამ და კიდევ სხვა კითხვებთან დაკავშირებით მშობლებს სხვადასხვა წარმოდგენა აქვთ, რაც საბოლოოდ, ზამთარში, ბავშვების ჯანმრთელობასთან დაკავშირებით, სხვადასხვა მითს წარმოშობს. დიახ, პედიატრები მითს უწოდებენ ზამთრის სეზონთან ასოცირებულ ამ შეხედულებებს, რომლებსაც mshoblebi.ge სტატიაში გაგიზიარებთ.

მითი №1. ბავშვს ყურის ანთება/ცხვირი გამონადენი/სიცხე აქვს, რადგან გარეთ ქარში თამაშობდა

სინამდვილეში: ბავშვებში შუა ყურის ანთებისა და ცხვირიდან გამონადენის მიზეზი, ისევე როგორც ტემპერატურის მატებისა, უმეტეს შემთხვევაში, ვირუსული ან ბაქტერიული ინფექციაა. ქუჩაში ვირუსებსა და ბაქტერიებს ქარი ვერ “შემოგიბერავთ”. იმის გამო, რომ ქუდი კარგად არ ფარავდა ყურებს, ოტიტი ვერ განვითარდება. ბევრად უფრო ადვილია ინფიცირება შიდა სივრცეში: საბავშვო ბაღში, სკოლაში, სახლში.

ვირუსი ლორწოვან გარსზე (ყველაზე ხშირად ნაზოფარინქსი) მოხვედრისას სწრაფად ემაგრება მას და სხეულში იჭრება. ლორწოვან უჯრედებში გამრავლებული ვირუსული ინფექცია უკვე სიმპტომებს იწვევს. ზოგჯერ ბაქტერია (მაგალითად, პნევმოკოკი) ხვდება ლორწოვან გარსზე (მაგალითად, შუა ყურზე) – და ბაქტერიული ინფექცია იწყება (მწვავე ოტიტი). ქარი და დაუფარავი ყურები არანაირად არ იმოქმედებს ამ პროცესზე.

მითი No2. ბავშვი ავად გახდა იმის გამო, რომ თოვლი შეჭამა

სინამდვილეში: თეორია, რომ ცივი საკვები და სასმელი ადამიანში გრიპისმაგვარ სიმპტომებს იწვევს, ჰიპოკრატეს დროიდანაა ცნობილია (ძვ. წ. 460–370). სწორედ მაშინ ითვლებოდა, რომ ჯანმრთელობა დამოკიდებულია სიცხისა და სიცივის, ტენიანობისა და სიმშრალის ბალანსზე. ეს იდეა დღესაც ცოცხლობს. და ზედა სასუნთქი ინფექციების მიზეზად ხშირად მოიხსენიებენ ცივ წყალს, ნაყინს, თოვლს, რომელიც ბავშვმა ქუჩაში შეჭამა. სინამდვილეში, ბავშვებში ხშირი დაავადებების მიზეზი ვირუსული ინფექციებია, რომლებიც ცხვირიდან და ადენოიდული ქსოვილიდან იჭრებიან ორგანიზმში.

როდესაც ბავშვი ცივ საკვებს ან სასმელს ჭამს, პირი და საყლაპავი ცივდება. ცხვირის ღრუ და ადენოიდები კი განლაგებულია უფრო მაღლა და რაიმე ცივი ჭამის დროს ისინი არ ეხებიან ცივ საკვებს და არ ცივდებიან.

გარდა ამისა, არ არსებობს მტკიცებულება იმისა, რომ ცივი საკვების მიღებამ შეიძლება გაციება გამოიწვიოს. პირიქით, ადენოიდების ქირურგიული მოცილების შემდეგ, ბავშვს ნაყინს აძლევენ ტკივილის შესამსუბუქებლად. ასევე, ცივი საკვები (ჩვენს შემთხვევაში, თოვლი) პირის ღრუსთან მცირე ხნით შედის კონტაქტში (რამდენიმე წამის შემდეგ ისევ თბება), რაც არ იწვევს ლორწოვანი გარსის რაიმე ცვლილებას.

მითი No3. სიცხიანი ბავშვის გარეთ გაყვანა არ შეიძლება

სინამდვილეში: როდესაც ტემპერატურა მატულობს, სიცივეში სიარული ნამდვილად არ არის კომფორტული, განსაკუთრებით თუ ბავშვი თავს კარგად არ გრძნობს. მაგრამ როცა ტემპერატურა დაიკლებს, თუნდაც დამწევის ფონზე და ბავშვი თავს უკეთ გრძნობს, შეგიძლიათ გარეთ გასვლა და ხანმოკლე გასეირნება. ეს არ იმოქმედებს დაავადების შემდგომ მიმდინარეობაზე. ის ფაქტი, რომ ბავშვი ცივ ჰაერს სუნთქავს, არ გაართულებს დაავადების მიმდინარეობას. პნევმონია ან ოტიტი სიარულის დროს არ განვითარდება, რადგან ეს არის ბაქტერიული ინფექცია.

თუ ბავშვის ექიმთან წაყვანა დაგჭირდათ, შეგიძლიათ სიცხის დამწევი მისცეთდა მაღალი ტემპერატურის დროსაც კი მიიყვანოთ ვიზიტზე.

მითი No4. ალერგია ზამთარში ქრება

სინამდვილეში: ალერგიული რინიტის ყველაზე გავრცელებული ტიპი გამოწვეულია მტვრისგან. ამიტომ ზამთარში ამ ტიპის ალერგია ნამდვილად მცირდება. მაგრამ სხვა ალერგენები, როგორიცაა სახლის მტვრის ტკიპები და ობი, სახლებში მთელი წლის განმავლობაში რჩება. ხანდახან ზამთარში ისინი კიდევ უფრო აქტიურობენ, რადგან დათბუნვის გამო ბინები ნაკლებად ვენტილირებადია, ადამიანები ნაკლებად დადიან სუფთა ჰაერზე და უფრო ხშირად რჩებიან სახლში.

ამიტომ, ზამთარში ალერგიული რინიტი ძალიან რეალურია. ზოგჯერ ამ ტიპის ალერგიას ზამთრის ალერგიას უწოდებენ, რადგან თბილ სეზონზე შეიძლება ბევრად უფრო ადვილად გამწვავდეს. თუ ბავშვს შეამჩნევთ სურდოს, რომელიც ზამთრის პერიოდში ერთი დღითაც არ ქრება, ეს შეიძლება ალერგიის სიმპტომი იყოს და არა ვირუსული რინიტის. თუმცა, უნდა გვახსოვდეს, რომ ალერგიული რინიტი 2-3 წლამდე ასაკის ბავშვებში საკმაოდ იშვიათია.

მითი No 5: გაციების თავიდან ასაცილებლად, ბავშვს მულტივიტამინი და ვიტამინი C უნდა მივაშველოთ.

ფაქტი: 2018 წლის ოქტომბრის გამოკითხვაში მონაწილეობა მიიღო 5-დან 12 წლამდე ასაკის ბავშვთა 1100-ზე მეტმა მშობელმა. გამოკითხული მშობლების დაახლოებით 51%-მა აღნიშნა, რომ გაციების თავიდან ასაცილებლად შვილს ვიტამინები ან დანამატები (როგორიცაა ვიტამინი C ან თუთია)მისცეს. დიახ, C ვიტამინის რეკომენდირებული დღიური დოზა (30-80 მგ) ხელს უწყობს ჩვენი იმუნური სისტემის ჯანმრთელობის შენარჩუნებას, მაგრამ, სამწუხაროდ, ის აბსოლუტურად არ მოქმედებს რესპირატორულ ვირუსებზე.

სინამდვილეში, ექსპერტების უმეტესობა თანხმდება, რომ ვიტამინი C დაავადების ხანგრძლივობის შემცირებას ისევე უწყობს ხელს, როგორც პლაცებო აბი. C ვიტამინის დიდი დოზები, როგორც წესი გვერდით მოვლენებს იწვევს, როგორიცაა თირკმლის კენჭი, გულისრევა და დიარეა. მრავალფეროვანი კვება, რომელიც ბოსტნეულს და ხილს შეიცავს(მაგალითად, C ვიტამინის დღიური დოზა გვხვდება 1 ფორთოხალში), ხელის დაბანა, ნამდვილად სასარგებლოა ბავშვისთვის და არა მხოლოდ გრიპის ეპიდემიის დროს.