”4 ბავშვი ჩავსვი ავტობუსში და ლოცვით გამოვაცილე, რომ ავტობუსს მშვიდობით გაევლო” – მეწყრული პროცესი სოფელ ფამფალეთში

სოფელ ფამფალეთში მოსახლეობა შველას ითხოვს. სოფლის ცენტრალური გზა, რომელიც რამდენიმე სოფელს აკავშირებს, უკვე დიდი ხანია ინტენსიურად იმეწყრება და იშლება. როგორც ადგილობრივები ამბობენ, არაერთხელ მიმართეს სოფლის რწმუნებულს, ითხოვენ გეოლოგების ჩართვას და მოსახლეობის უსაფრთხოების დაცვას, თუმცა ერთადერთი რაც წლების მანძილზე ადგილობრივი ხელისუფლებისგან მიიღეს, ამ დამეწყრილ გზაზე ხრეშის დაყრა და ვითარების მცირე დროით გამოსწორება იყო.

ფამფალეთში ამბობენ, რომ საფრთხის წინაშეა მათი სახლები, ფანჯრები აღარ იკეტება და მიწის დაძვრის სხვა არაერთი სიმპტომი უკვე სახეზეა, თუმცა ამ დრომდე ხელისუფლების მხრიდან ქმედითი ნაბიჯების გადადგმას ადგილობრივებმა ვერ მიაღწიეს.