„35 წლის შემდეგ თბილისში ტრამვაი დაბრუნდება” – სად აშენდება ტრამვაის ხაზი

„35 წლის შემდეგ თბილისში ტრამვაი დაბრუნდება” – ამის შესახებ თბილისის მერმა კახა კალაძემ განაცხადა.

როგორც მან აღნიშნა, ტრამვაის ხაზი დიდ დიღომსა და მეტროსადგურ დიდუბეს დააკავშირებს. პროექტირებისა და მშენებლობისთვის კი მერია ტენდერის გამოცხადებას დღეს გეგმავს.

„საქართველოს დამოუკიდებლობის ისტორიაში პირველად განხორციელდება ტრამვაის პროექტი. დღეს ვაცხადებთ ტენდერს, ტრამვაის ხაზის პროექტისა და სამშენებლო სამუშაოების შესყიდვაზე. მანამდე გამოცხადებული გვქონდა ბაზრის კვლევასთან დაკავშირებით შესყიდვა. გვაქვს ინფორმაცია იმასთან დაკავშირებით, თუ რა უნდა გაკეთდეს და რომელ მონაკვეთზე უნდა განხორციელდეს.

„35 წლის შემდეგ თბილისში ტრამვაი დაბრუნდება” – სად აშენდება

შეგვიძლია ვთქვათ, რომ 35 წლის შემდეგ დაბრუნდება ტრამვაი. აშენდება ევროპული სტანდარტების ტრამვაის ხაზი, რომელიც დიდი დიღმის დასახლებას მეტროსადგურ დიდუბესთან დააკავშირებს. პროექტის მიზანია დიდი დიღმის დასახლება თბილისის სხვადასხვა უბანთან უმოკლეს დროში დავაკავშიროთ”, – განაცხადა კალაძემ.

ამასთანავე, უკვე ცნობილია, რომ ტრამვაის ახალი ხაზი ჯამში 7.6 კილომეტრს დაფარავს და სულ 11 გაჩერება ექნება. კალაძის განცხადებით, ტრამვაის ხაზი თბილისში საცობებს განტვირთავს.

„ტრამვაის 7.6 კმ-იან გაზზე იქნება 11 გაჩერება, შედეგად ტრამვაი დიდი დიღმის გაზრდილი მგზავრთნაკადის უსაფრთხო და სწრაფ გადაადგილებას უზრუნველყოფს, შეამსუბუქებს ავტობუსებსა და მიკროავტობუსებზე დატვირთვას, განტვირთავს საცობებს და გააუმჯობესებს ეკოლოგიურ მდგომარეობას“, – აცხადებს კალაძე.

www.bpn.ge