ქარელის მუნიციპალიტეტის სოფელ რუისში 31 წლის ქალი გარდაიცვალა. გარდაცვლილი ნინო აბრამოვის ახლობლები მომხდარში სასწრაფო დახმარების ჯგუფს ადანაშაულებენ. გარდაცვლილის მამის განცხადებით, მის შვილს დახმარება დროულად არ გაუწიეს.
„ჩემი შვილი ოჯახთან ერთად გორის მუნიციპალიტეტის სოფელ ნაწრეტში ცხოვრობდა, რუისში კი დღიურ სამუშაოზე იყო დასაქმებული და ნაწრეტიდან ყოველდღიურად დადიოდა. მასთან ერთად მყოფი პირების გადმოცემით, როდესაც ბაღში მუშაობისას ცუდად გახდა, სასწრაფო გამოძახეს, სასწრაფოს არაფერი გაუკეთებია ჩემი შვილის გადასარჩენად და გარდაცვლილად დაუფიქსირებია. ზეწარი გადააფარეს და პროზექტურაში გადასვენებას ელოდებოდნენ, მაგრამ როცა ჩვენ მივედით, მას ჯერ ისევ ესინჯებოდა პულსი. ჩვენ წამოვიყვანეთ გორში საავადმყოფოში, მაგრამ უკვე დაგვიანებული იყო, სასწრაფოს რომ დროულად გადაეყვანა კლინიკაში, დარწმუნებული ვარ, გადარჩებოდა. ჩემს შვილს ასთმა ჰქონდა, ადრეც ჰქონია პრობლემები, მაგრამ ექიმები ყოველთვის შველოდნენ, ახლაც გადარჩებოდა რომ გარკვეულიყვნენ მკვდარი იყო თუ ცოცხალი და დროულად გაეწიათ დახმარება“, – აცხადებს გარდაცვლილი ქალის მამა გელა აბრამოვი.
როგორც სამედიცინო ცენტრ “გორმედის“ კლინიკურმა დირექტორმა განაცხადა, სამედიცინო დაწესებულებაში შეყვანისას პაციენტი გარდაცვლილი იყო.
ნინო აბრამოვს ოთხი მცირეწლოვანი შვილი ჰყავს.
Loading ...