25 154 ადამიანს საქართველოს მოქალაქეობა, რუსეთის მოქალაქეობის მიღების გამო შეუწყდა – სტატისტიკა 2013-2023 წლების მიხედვით

2013 წლის პირველი იანვრიდან 2023 წლის 28 სექტემბრამდე, საქართველოს მოქალაქეობა 43 488 ადამიანს შეუწყდა.

პარლამენტის წევრის, ანა ნაცვლიშვილის სადეპუტატო კითხვის პასუხად, სახელმწიფო სერვისების განვითარების სააგენტოში აცხადებენ, რომ 43 488 ადამიანიდან, ნახევარზე მეტს, 25 154 პირს საქართველოს მოქალაქეობა იმის გამო შეუწყდა, რომ რუსეთის ფედერაციის მოქალაქეობა მიიღო.

აღსანიშნავია, რომ მხოლოდ მიმდინარე წლის 9 თვეში რუსეთის მოქალაქეობის მიღების შედეგად საქართველოს მოქალაქეობა 2 189 ადამიანს გაუუქმდა.

რუსეთის მოქალაქეობის მიღების გამო საქართველოს მოქალაქეობის შეწყვეტის მაჩვენებელი ყველაზე მაღალი 2013 წელს იყო, როდესაც ამ მიზეზით საქართველოს მოქალაქეობა შეუწყდა 11 758 ადამიანს.

რუსეთის მოქალაქეობის მიღების შედეგად, საქართველოს მოქალაქეობის შეწყვეტის სტატისტიკა 2013-2023 წლების მიხედვით ასეთია:

• 2013 წელი – 11 758 ადამიანი;
• 2014 წელი – 2 874 ადამიანი;
• 2015 წელი – 2 523 ადამიანი;
• 2016 წელი – 1 071 ადამიანი;
• 2017 წელი – 1 206 ადამიანი;
• 2018 წელი – 877 ადამიანი;
• 2019 წელი – 692 ადამიანი;
• 2020 წელი – 252 ადამიანი;
• 2021 წელი – 354 ადამიანი;
• 2022 წელი – 1 358 ადამიანი;
• 2023 წელი (28 სექტემბრის მდგომარეობით) – 2 189 ადამიანი.