კალიფორნიაში 25-მა შეიარაღებულმა პირმა საიუველირო მაღაზია გაძარცვა, მოპარულია 1 მილიონი დოლარის ღირებულების საქონელი, – ამის შესახებ „ეიბისი ნიუსი“ წერს.
ჯგუფმა კალიფორნიის ქალაქ სან რამონში მდებარე Heller Jewelers-ის მაღაზია გაძარცვა. შემთხვევა ორშაბათს, შუადღისას მოხდა, ვიდეოკადრები კი დღეს გავრცელდა.
ვიდეოში ჩანს ნიღბიანი, შავებში ჩაცმული ადამიანების ჯგუფი, რომლებიც კალიფორნიის საიუველირო მაღაზიაში შერბიან.
პოლიციის განცხადებით, მძარცველებს სულ მცირე სამი იარაღი ჰქონდათ. ამ დროისთვის დაკავებულია შვიდი ეჭვმიტანილი, მათ შორის ერთი არასრულწლოვანი. ეჭვმიტანილების ასაკი 17-დან 31 წლამდეა და სავარაუდოდ, ყველა ადგილობრივი მცხოვრებია. როგორც პოლიცია აცხადებს, ეჭვმიტანილები სავარაუდოდ დაკავშირებულები არიან სხვა ანალოგიურ ძარცვებთანაც.
მედიის ცნობით, ბოლო ორი წლის განმავლობაში ეს მეორე შემთხვევაა, როცა Heller Jewelers მასშტაბური ძარცვის სამიზნე გახდა.
2023 წელს, შვიდი ნიღბიანი პირი ანალოგიურად შეიჭრა მაღაზიაში და მოიპარა 1,1 მილიონი დოლარის ღირებულების საქონელი. მძარცველები მოგვიანებით დააკავეს.
Loading ...