2024 წლამდე გამოშვებული ყველა ავტომობილის განბაჟება ძვირდება – რამდენის გადახდა მოგიწევთ ახალი რეგულაციებით

ქვეყანაში ავტომობილების განბაჟების ტარიფი იზრდება. აღნიშნულთან დაკავშირებით, კანონპროექტი, პარლამენტმა ცოტა ხნის წინ, დაამტკიცა.

საკანონმდებლო ორგანოს მიერ მიღებული ცვლილებებით, ახალი ტარიფების ამოქმედება, ხვალიდან, 2 აპრილიდან არის დაგეგმილი.

აქვე შენიშვნის სახით, უნდა ითქვას, რომ კანონში დაშვებულია გარკვეული გამონაკლისებიც. დეტალები იხილეთ სტატიაში:

აღსანიშნავია, რომ ახალი კანონის თანახმად, განბაჟების საფასური იზრდება 2024 წლამდე გამოშვებულ ყველა ავტომობილზე.

რა დაჯდება საშუალოდ, ავტომობილის განბაჟება

უფრო კონკრეტულად, ცვლილებების თანახმად, აქციზის განაკვეთი 0-დან 6 წლის ჩათვლით ასაკის ავტომობილების ნაწილისთვის ძრავის მოცულობის 1 კუბურ სანტიმეტრზე 1.5 ლარის ოდენობით განისაზღვრა.

ამ კატეგორიაში, 2024-2025 წლებში გამოშვებული ავტომობილების შემთხვევაში აქციზის განაკვეთი ისედაც 1.5 ლარი იყო; თუმცა ცვლილება ეხება 2020-2021-2022-2023 წლებში გამოშვებულ მანქანებს.

აქამდე მოქმედი რედაქციით, ამ წლოვანების ავტომობილების განბაჟების ტარიფი 1 კუბურ სანტიმეტრზე 0.8-1.4 ლარის ფარგლებში მერყეობდა, ცვლილებების შემდეგ კი 1.5 ლარი ლარი იქნება.

შესაბამისად, გამოდის რომ, განბაჟების საფასური გაიზარდა 3-დან 6 წლის ჩათვლით ავტომობილებისთვისაც. ახალი ტარიფით:

• 2023-წლიანი (1.0 ძრავი) – გაიზარდა 1.5 ლარამდე, მოქმედი იყო 1.4 ლარი – გამოდის, რომ თუ მანქანის განბაჟება გიჯდებოდათ 1400 ლარი, უკვე 1500 ლარის გადახდა მოგიწევთ;
• 2022-წლიანი (1.0 ძრავი) – გაიზარდა 1.5 ლარამდე, მოქმედი იყო 1.2 ლარი – გამოდის, რომ თუ მანქანის განბაჟება გიჯდებოდათ 1200 ლარი, ხვალიდან 1500 ლარის გადახდა მოგიწევთ;
• 2021-წლიანი (1.0 ძრავი) – გაიზარდა 1.5 ლარამდე, მოქმედი იყო 1 ლარი – გამოდის, რომ თუ მანქანის განბაჟება გიჯდებოდათ 1000 ლარი, ხვალიდან 1500 ლარის გადახდა მოგიწევთ;
• 2020-წლიანი (1.0 ძრავი) – გაიზარდა 1.5 ლარამდე, მოქმედი იყო 0.8 ლარი – გამოდის, რომ თუ მანქანის განბაჟება გიჯდებოდათ 800 ლარი, ხვალიდან 1500 ლარის გადახდა მოგიწევთ.

შესაბამისად, ახალი კანონმდებლობით, 3-დან 6 წლის ჩათვლით ავტომობილებისთვის (1.0-ძრავიანის შემთხვევაში) განბაჟების საფასური ასაკის მიხედვით, 100-დან 700 ლარამდე თანხის ფარგლებში იზრდება.

რაც შეეხება, 6 წელზე მეტი ასაკის ავტომობილებს, მათ შემთხვევაში განბაჟების საფასური 4.5 ლარი ხდება, რაც ფაქტობრივად 5.6-ჯერ გაზრდილი ტარიფია, რადგან კანონის ძველი რედაქციით, 6 წელზე მეტი ხნის წინ გამოშვებული ავტომობილების განბაჟებისთვის ძრავის 1 კუბური სანტიმეტრი 0.8 ლარის აქციზით იბეგრებოდა.

შედეგად, თუ ავიღებთ 6 წელზე მეტი წლოვანების (პირობითად 2019-წლიანი) ავტომობილს, ძრავის მოცულობის მიხედვით, განახლებული ტარიფებით, მისი განბაჟების საფასური ასე შეიცვლება:

• 1.0-ძრავიანი – 800 ლარიდან 4 500 ლარამდე გაიზარდა;
• 1.5-ძრავიანი – 1 875 ლარიდან 6 750 ლარამდე გაიზარდა;
• 2.0 -ძრავიანი – 1 600 ლარიდან 9 000 ლარამდე გაიზარდა;
• 3.0-ძრავიანის – 2400 ლარიდან 13 000 ლარამდე გაიზარდა.

ცნობისთვის, შემოსავლების სამსახურის კალკულატორის მიხედვით, განბაჟების გადასახადში გათვალისწინებულია და საფასური იცვლება ავტომობილის ტიპის (ბენზინი, დიზელი, ჰიბრიდი, ელექტრომობილი), წლოვანების, ასევე ძრავის მოცულობის მიხედვით.

www.bpn.ge