აჭარაში ნარინჯისფერი რთველი უკვე დაწყებულია და 250 ტონა ექსპორტზეა გასული -ამის შესახებ ,,ბიზნესპრესნიუსთან“ აჭარის ავტონომიური რესპუბლიკის სოფლის მეურნეობის მინისტრმა განაცხადა.
გიორგი სურმანიძის თქმით, ტრადიციულ საექსპორტო ბაზრებთან ერთად წელს ქართული ციტრუსი შუა აზიაშიც გავა.
,,წელს, აჭარაში მანდარინის მოსავლის მოსალოდნელი რაოდენობა 70 000 ტონაა. საკმაოდ კარგი მოსავალია და კრეფა უკვე დაწყებულია. დაახლოებით, 250 ტონამდე ექსპორტზე უკვე გასულია, ძირითადი რაოდენობა სომხეთში გადის. წელს დაინტერესება საკმაოდ დიდია და ამიტომ, ვთვლით, რომ ნარინჯისფერი რთველი საკმაოდ კარგად ჩაივლის.
გასულ წელთან შედარებით, წელს 20 000 ტონით მეტ მოსავალს ველოდებით. რაც შეეხება ფასებს, ამაზე საუბარი მე არ შემიძლია, რადგან ვარ სახელმწიფოს წარმომადგენელი და ჩემგან ღიად ფასის დასახელებამ შესაძლოა, ბაზარზე გაურკვევლობები გამოიწვიოს. ვიტყვი ასე, სავარაუდოდ, შენარჩუნებული იქნება შარშანდელი ფასი და არ არის გამორიცხული ფასის ზრდაც მოხდეს გარკვეული მიზეზების ასახვით.
ძირითადი საექსპორტო ბაზრები კვლავ არის ტრადიციული ბაზრები ჩვენთვის და დაემატა ახალი ქვეყნები, ესენია შუა აზიის ქვეყნები. მე, პირადადაც შევხვდი ამ მიზნით ყაზახეთის, უზბეკეთის, ტაჯიკეთის, ყირგიზეთის წარმომადგენლებს. ვფიქრობთ, წელს ამ ბაზრებზე გარკვეული პარტიები გავა, ისე როგორც პოლონეთში. თუმცა, ეს მაინც კერძო სექტორის უშუალო პრეროგატივაა. ჩვენ ჩვენის მხრივ შეგვიძლია დავეხმაროთ ბიზნესს, დოკუმენტაციის მოგროვებაში, სახელმწიფო სერვისების დროულ მიღებაში და სხვა, მსგავს ლოგისტიკურ საკითხებში. სწორედ ამ მიზნით, ჩვენ ყოველწლიურად ვქმნით ციტრუსის რელიზაციის სააკორდინაციო შტაბს, რომლის ფარგლებშიც ყველა საკითხის მყისიერი გადაწყვეტა ხდება“-განაცხადა გიორგი სურმანიძემ ,,ბიზნესპრესნიუსთან“.
ინფორმაციისთვის, გარემოს დაცვისა და სოფლის მეურნეობის სამინისტროს ინფორმაციით, 2020 წლის 1-ლი აგვისტოდან 2021 წლის 21 თებერვლამდე პერიოდში განხორციელდა 39.3 ათასი ტონა მანდარინის ექსპორტი, რაც რეკორდულია უკანასკნელი 10 წლის (მარკეტინგული წლები) მაჩვენებლების მიხედვით და რომლის ღირებულებამ 19.1 მლნ აშშ დოლარი შეადგინა.
www.bpn.ge
Loading ...