ოზურგეთის მუნიციპალიტეტის ახლადდაკომპლექტებული, 2022 წლის საკრებულო მუშაობას 3 დეკემბრიდან შეუდგა. კანონის თანახმად, პირველივე სხდომაზე იქნენ არჩეულნი თავმჯდომარე, მისი მოადგილეები, კომისიის თავმჯდომარეები. შეიქმნა ფრაქციები, დეპუტატებმა აირჩიეს ფრაქციის თავმჯდომარეები და მოადგილეები.
ადვილი შესამჩნევია, რომ ახალ საკრებულოში მოადგილის პოსტი განსაკუთრებით პოპულარული გახდა. ამის მიზეზი კი ადგილობრივი თვითმმართველობის კანონში შესული ცვლილებაა, რომლის თანახმადაც საკრებულოს თავმჯდომარეს შეუძლია ერთის ნაცვლად უკვე სამი მოადგილე ჰყავდეს. ხოლო პარტიები ფრაქციების შექმნის რაოდენობაში შეიზღუდნენ და განსხვავებით წინა წლებისგან, როცა საკრებულოს ყოველ სამ დეპუტატს ფრაქციის შექმნა შეეძლო, ამიერიდან თითო პარტიას მხოლოდ თითო ფრაქციის შექმნის უფლება აქვს, თუმცა ყოველ სამ წევრზე, ფრაქციას შეუძლია ჰყავდეს მოადგილე, არა უმეტეს ჯამში შვიდი მოადგილისა ერთი ფრაქციის შემთხვევაში. ასე მაგალითად, თუ ფრაქცია 9 წევრიანია, მის თავმჯდომარეს სამი მოადგილის ყოლის უფლება აქვს. აქედან გამომდინარე, ამჟამად ოზურგეთის საკრებულოს 13 დეპუტატი მოადგილეა, ზოგი ფრაქციის თავმჯდომარის, ზოგიც – საკრებულოს თავმჯდომარის.
რაც შეეხება კონკრეტიკას:
ოზურგეთის საკრებულოს თავმჯდომარეს, უკვე მესამედ არჩეულ დავით დარჩიას სამი მოადგილე ჰყავს: ლავრენტი ბიგვავა, ნათია გოლიაძე და გელა აროშიძე.
ამავე საკრებულოში შეიქმნა სამი ფრაქცია. მათგან ყველაზე მოცულობითი, 30 დეპუტატისგან შემდგარი ”ქართული ოცნება – დემოკრატიული საქართველოა”, რომლის თავმჯდომარე დვაბზუ-ბახვის მაჟორიტარი დეპუტატი მარიკა ჩხიკვიშვილია. ჩხიკვიშვილს ექვსი მოადგილე ჰყავს: ხათუნა ცერცვლაძე, გოჩა კილაძე, ლევან კილაძე, ნინო ნადირაშვილი, ნუგზარ ურუშაძე და გოჩა მდინარაძე.
ათკაციანი ფრაქცია ”ერთიანი ნაციონალური მოძრაობის” თავმჯდომარე დავით მჟავანაძეა. მჟავანაძეს სამი მოადგილე ჰყავს: შალვა თავდიშვილი, თორნიკე გოგუაძე და ბესო ქათამაძე.
ფრაქციაში ”ოზურგეთი – საქართველოსთვის” ოთხი დეპუტატი შედის. მისი თავმჯდომარე ქალაქ ოზურგეთის ყოფილი ვიცე-მერი და ამჟამად დეპუტატი ალეკო ბურჭულაძეა. მოადგილე კი პეტრე სალუქვაძეა.
რაც შეეხება ფინანსურ ნაწილს, საინტერესოა, რამდენი იხარჯება ბიუჯეტიდან 22 თანამდებობის პირის ხელფასებისთვის.
საკრებულოს თავმჯდომარის ხელფასი 3 000 ლარია. პირველი მოადგილის ლავრენტი ბიგვავასი – 2 600, მოადგილეების ნათია გოლიაძისა და გელა აროშიძის კი – 2 400.
რაც შეეხება კომისიებს, საკრებულოში სულ 5 კომისია მოქმედებს. მათი თავმჯდომარეების ხელფასი კი 2 000 ლარია. რაც შეეხება ფრაქციებს, ფრაქციის თავმჯდომარის ხელფასი 2 000 ლარია, მოადგილის კი 1 500 ლარი.
საერთო ჯამში, გარდა საკრებულოს აპარატის თანამშრომლებისა, საკრებულოს თანამდებობის პირებისთვის, მათ შორის უხვად მოვლენილი მოადგილეებისთვის საერთო ჯამში ბიუჯეტიდან თვეში 41 400 ლარი, ხოლო ერთი წლის მანძილზე 496 800, თითქმის ნახევარი მილიონი ლარი დაიხარჯება. რაც ნიშნავს იმას, რომ საკრებულოს უფლებამოსილების საერთო ვადაში, 4 წლის მანძილზე აღნიშნული პირების ხელფასებში 1 987 200 ლარი დაიხარჯება.
აღსანიშნავია, რომ დამატებითი თანხაა გამოყოფილი თანამდებობის პირთა საწვავით უზრუნველყოფისთვის.
რამდენად მართებული და გონივრულია 45 დეპუტატით დაკომპლექტებულ საკრებულოში 22 თანამდებობის პირი, რომელთა ხელფასებისთვის მოსახლეობამ თითქმის ორი მილიონი ლარი უნდა გადაიხადოს, ეს უკვე ცალკე მსჯელობის საგანია.
Loading ...
