120-ზე მეტი ადამიანი ემსხვერპლა ავიაკატასტროფას სამხრეთ კორეაში

თვითმფრინავი, – კომპანია Jeju Air-ის ბოინგი 737-800, რეისის ნომრით 7C 2216, – რომელშიც 175 მგზავრი და ეკიპაჟის 6 წევრი იმყოფებოდა, დაშვებისას შასის (ბორბლების) გახსნის გარეშე შეეხო ასაფრენ-დასაჯდომ ზოლს, რის შემდეგაც ცეცხლი გაუჩნდა.

ოფიციალური უწყებების თანახმად, კატასტროფა თვითმფრინავის „დასაფრენი მექანიზმის გაუმართაობამ“ გამოიწვია.

კადრებში ჩანს, როგორ მიცურავს თვითმფრინავი ასაფრენ-დასაფრენ ბილიკზე მუცლით, მაღალი სიჩქარით, ბილიკიდან ვარდება და სანაპიროსთან ჯებირებს ეჯახება.

ავიაკატასტროფა სამხრეთ კორეის სამხრეთ-დასავლეთ ნაწილში მოხდა.

ნაპოვნია ორი გადარჩენილი – ორივე ეკიპაჟის წევრია. სამაშველო სამუშაოები გრძელდება.

მობილიზებულია 700-ზე მეტი პოლიციელი, ჯარისკაცი და სასაზღვრო დაცვის თანამშრომელი.