წინააღმდეგობის ეს გურული ისტორია მარტის იმ დღეს დაიწყო, როცა პრორუსული განწყობებით ცნობილმა კონსერვატიულმა მოძრაობამ ოზურგეთში ოფისის გახსნა დააანონსა.
რუსული სიმპათიების ასე ღიად აფიშირების იდეა გურიაში საკმაოდ მტკივნეულად აღიქვეს. ამიტომ ფეისბუქზე გურული სისხარტით გაჩნდა ‘’ალტ ინფოს წინააღმდეგობის ჯგუფი’’, სადაც რუსული პროპაგანდის გამპროტესტებელი ხალხი სასწრაფოდ შეიკრიბა და ოკუპანტი ქვეყნის ინტერესების გამტარებელი რბილი ძალის წინააღმდეგ სამოქმედო გეგმის დასახვა დაიწყო.
პროტესტი მალევე დაიწყო, სოციალური ქსელიდან ფიზიკურ რეალობაში გადმოინაცვლა, ქალაქის ცენტრში, ქუჩების მეშვეობით, კონსერვატიული პარტიის ოფისისკენ მსვლელობის სახე მიიღო და გზად კიდევ ბევრი რიგითი მოქალაქე შემოიერთა.
არაერთ საპროტესტო აქციასა და პერფორმანსს შორის, განსაკუთრებით აღსანიშნავია 2022 წლის 14 აპრილს ორგანიზებული მსვლელობა, რომელიც მშვიდობიანი ხასიათით, თუმცა საკმაოდ მწვავე პოლიტიკური აქცენტების დასმით იყო აღსანიშნავი.
გარდა ოზურგეთისა, წინააღმდეგობა გაღვივდა ლანჩხუთსა და ჩოხატაურშიც. სადაც ასევე ჩატარდა მშვიდობიანი აქციები კონსერვატიული მოძრაობის წინააღმდეგ.
ისევე, როგორც ყველა ტიპის პროტესტს, ამ წინააღმდეგობასაც გაუჩნდა ბირთვი, რომელმაც თავის თავში 12 განრისხებული გურული იგულისხმა, ერთმანეთს დაუკავშირა და სამომავლოდ არაერთი ნაბიჯი გადაადგმევინა რუსული ბოროტების წინააღმდეგ.
რა ხდება, როცა ჰუმანისტური ღირებულებები და პატრიოტული სულისკვეთება ერთმანეთს ემთხვევა და ქვეყნისთვის გარდამტეხი ეტაპი დგას? ასეთ დროს გაერთიანებას ალტერნატივა არა აქვს. ამიტომაც დაუგეგმავად და ძალიან ბუნებრივად შეიქმნა სამოქალაქო მოძრაობა ‘’თავისუფლებისთვის’’ რომელმაც თავის თავში ანტირუსულ საქმიანობასთან ერთად ევროპული ღირებულებების პროპაგანდა და საზოგადოებისთვის იმ სიმართლის თქმა იგულისხმა, რომელსაც პრორუსული ძალები ასე საგულდაგულოდ მალავენ და ამახინჯებენ.
მოძრაობის საჯაროდ ყველაზე ცნობილი წარმომადგენელი ირმა გორდელაძეა – ისტორიისა და სამოქალაქო განათლების პედაგოგი. პედაგოგიურ საქმიანობასთან ერთად, თუ აქამდე მისი მთავარი საზრუნავი გურიის ეკოსისტემის დაზიანების წინააღმდეგ ბრძოლა იყო, კონსერვატიული მოძრაობის და ტელეარხ ‘’ალტ ინფოს’’ გამოჩენის შემდეგ მთავარ მიზნად რუსული იმპერიალისტური პროპაგადისგან მისი რეგიონის დაცვა დაისახა.
ალბათ ყველაზე მნიშვნელოვანი, რაც ახალ საზოგადოებრივ ლიდერად ქცეულმა ირმა გორდელაძემ საჯაროდ, ტელეეთერებში თქვა, გურული კილოკავით ნათქვამი, მაგრამ ძალიან საჭირო ფრაზა იყო: ” ამ ალტინფოს მომხრე ხალხი ყველა მოღალატე კი არაა, ტვინი აქვენ არეული”-ო.
აბსოლუტურად პოლარიზებულ ქართულ პოლიტიკასა და საზოგადოებაში, სადაც ”ვინც ჩემთან არ არის ჩემი მტერია”მთავარ იდეოლოგიად არის ქცეული, სადაც საზოგადოების რადიკალურ დაყოფაზე ხელსუფლებამ, ოპოზიციამ, საპატრიარქომ და მედიის დიდმა ნაწილმა ერთად იზრუნეს, სადაც პოლიტიკოსები მხოლოდ თავიანთ მომხრე მოქალაქეებს ესაუბრებიან და განსხვავებული პოლიტიკური არჩევანის მქონე ადამიანებს მწვავედ აკრიტიკებენ, როცა ხშირ შემთხვევაში არასამთავრობო სექტორმაც კი დაკარგა ხალხთან საკომუნიკაციო ენა, როცა საპატრიარქოს წარომადგენლები საწინააღმდეგო აზრის მქონე ადამიანებს შემორიგების ნაცვლად საჯაროდ და უკომპრომისოდ აკრიტიკებენ, ირმა გორდელაძის მიერ შემოთავაზებული აზროვნების მოდელი, თითქოს ახალი, მაგრამ კარგად დავიწყებული ქრისტიანული ფილოსოფიის ნაწილია.
”დაველაპარაკოთ ამ ხალხს, დავუმტკიცოთ, რომ ევროპა რუსეთზე უკეთესია, თორემ კი არ უნდა გავჟუჟოთ და შევიძულოთ ერთმანეთი, ხიდები კი არ უნდა დავწვათ, უნდა ავაშენოთ” – ირმა გორდელაძის მიერ ერთ-ერთ ტელეეთერში ნათქვამი ეს წინადადება ფაქტიურად მთელი მოძრაობის სამოქმედო სტრატეგიაა.
სამოქალაქო მოძრაობა ‘’თავისუფლებისთვის’’ ის პატარა მოდელია, როგორი ქვეყნისთვისაც მოძრაობის წევრები იბრძვიან. ერთმანეთისგან სრულიად განსხვავებული ადამიანები ერთი საქმისთვის იბრძვიან, ყველა გადაწყვეტილებას გუნდურად, დემოკრატიული პრინციპით იღებენ. ერთმანეთის საწინააღმდეგო აზრს პატივს სცემენ და საერთო მიზნისთვის აუცილებლად ერთიანდებიან.
საქმიანობის ერთ-ერთი უმთავრესი პრინციპი და მიზანი მოძრაობის წევრებისთვის ”მოქალაქის” ფენომენის გაძლიერებაა. როგორც თავად ამბობენ, როცა ადამიანები რამეს აპროტესტებენ ან ითხოვენ, არ შეიძლება ამის უკან გარდაუვლად პოლიტიკური ინტერესის ან პოლიტიკური გემოვნების დანახვა. იმისთვის, რომ შენს გარშემო გარემოს უკეთესობისკენ ცვლილება გინდოდეს, სრულიად შესაძლებელია, ეს, როგორც მოქალაქემ გააკეთო და ამის გამო სხვადასხვა ჯგუფი პოლიტიკურ კლიშეებს არ უნდა გაკერებდეს. მათი მოსაზრებით, საზოგადოებრივი პასუხისმგებლობები ადამიანმა, არა როგორც რომელიმე პოლიტიკური ან სხვა ჯგუფის მხარდამჭერმა, არამედ როგორც უბრალოდ მოქალაქემ უნდა აიღოს, რადგან სტატუსი ”მოქალაქე” თავის თავში გაცილებით დიდ პასუხისმგებლობებს, უფლებებსა და თავისუფლებებს გულისხმობს.
კონსერვატიული მოძრაობის ოფისების გახსნის წინააღმდეგ ბრძოლის შემდეგ ევროპული ღირებულებების დაცვის და გაძლიერების გზაზე კიდევ არაერთი საჭიროება გაჩნდა.
ამიტომაც მოძრაობამ სხვა მრავალი აქტივობა განახორციელა. მათგან გამორჩეული იყო ‘’შინ ევროპისკენ’’ კამპანია, რომელიც საზოგადოებისთვის სწორი ინფორმაციის მიწოდებას და მასზე დაყრდნობით ხალხში ევროპული არჩევანის გაძლიერებას გულისხმობდა.
მოძრაობა ”თავისუფლებისთვის” წევრები ერთმანეთისგან განსხვავდებიან, სხვადასხვა გემოვნების ადამიანები არიან, რიგ საკითხებთან დაკავშირებით საკუთარი პოზიცია აქვთ,მაგრამ ყველაზე მნიშვნელოვანს იაზრებენ: ინდივიდუალიზმის ადგილსა და ერთიანობის მნიშვნელობას სხვადასხვა სპეციფიკურ სიტუაციაში. ამის სიმბოლური ილუსტრაცია ეს ინტერვიუც არის, რომლის შეკითხვებიც მოძრაობის ერთ-ერთ წევრს გაეგზავნა, მაგრამ აღმოჩნდა, რომ მათზე პასუხები მთელი მოძრაობის მიერ არის გაცემული.
როგორ შეიქმნა თქვენი მოძრაობა და რომელია ის ღირებულებები, რომლებმაც გაგაერთიანათ?
სამოქალაქო მოძრაობა “თავისუფლებისათვის” შექმნა განაპირობა პრორუსული გავლენის გაძლიერებამ ქვეყანაში. რუსეთ-უკრაინის ომი ახალდაწყებული იყო, როცა შემთხვევით გავიგეთ, რომ გურიის ქალაქებში”კონსერვატორული მოძრაობის” ოფისები იხსნებოდა. იმ დღესვე გავერთიანდით ადამიანები, სამოქალაქო აქტივისტები, რათა წინააღმდეგობა გაგვეწია პუტინისტური მოძრაობისთვის. საპროტესტო აქციების პარალელურად, ჩამოვაყალიბეთ მოძრაობა და ვაგრძელებთ ჩვენს საქმიანობას. ჩვენი ღირებულებებია: პატრიოტიზმი, მოქალაქეობრივი პასუხისმგებლობა, თავისუფლება და საქართველოს ინტეგრაცია მშვიდობიან ბანაკში-ევროკავშირი.
როგორ იღებთ გუნდში გადაწყვეტილებებს და ამჟამად რაზე მუშაობთ?
ჩვენი მოძრაობის წევრებისთვის ძალიან მნიშვნელოვანია დემოკრატიულობის პრინციპი, შესაბამისად ნებისმიერი გადაწყვეტილება მიიღება ურთიერთშეთანხმებით, ეს პროცესი მიმდინარეობს მარტივად, ვინაიდან საკვანძო საკითხებზე და ღირებულებებზე იმთავითვე ვართ შეთანხმებულები. ამჟამად ვფიქრობთ, რომ ჩვენი მოძრაობა უნდა კონცენტრირდეს გურიის რეგიონში ევროპული ღირებულებების პოპულარიზაციაზე, უფრო აქტიური კომუნიკაცია იქონიოს მოსახლეობასთან, სხვა დაინტერესებულ მხარეებთან, რომლებიც ასევე ცდილობენ საკუთარი წვლილი შეიტანონ ევროინტეგრაციის პროცესში.
როგორ ფიქრობთ, რისკები, რომ ანტიდასავლური პროპაგანდა გაიმარჯვებს რამდენად მაღალია?
თუ გადავხედავთ ქვეყანაში მიმდინარე პროცესებს, ასევე სახელისუფლებო გუნდის რიტორიკას, რისკი არსებობს იმისა, რომ ანტიდასავლური პროპაგანდა კი არ გაიზარდოს, არამედ მისი შემცირების შანსები გაიწელოს დროში. მართალია საზოგადოების გარკვეული ნაწილი, რიგი მიზეზების გამო დუმს, თუმცა ჩვენი მოსახლეობის 85%-მა უკვე აირჩია ევროპული გზა. ხელისშემშლელი ფაქტორები არსებობს, მიუხედავად ამისა, არ ვაპირებთ მოდუნებას. ჩვენ არ ვართ მარტო. მხარდამხარ მივყვებით და ვიზიარებთ იმ სამოქალაქო მოძრაობების სტრატეგიასა და ტაქტიკას, რომლებმაც შეძლეს და სამი მასშტაბური აქცია გამართეს თბილისში, ევროპული ღირებულებებისკენ სწრაფვისა და საბოლოოდ იმ დიდ ოჯახში გაწევრიანების მოთხოვნით, რომელსაც ევროკავშირი ჰქვია. საქართველოს, გარდა ევროკავშირში გაწევრიანებისა, სხვა ალტერნატივა არ აქვს.
რამდენად სპეციფიკურია ვითარება რეგიონებში და ხომ არ ფიქრობთ, რომ ხალხთან, რომლებსაც ნაკლები წვდომა აქვთ სოცქსელებთან, მედიის ფართო სპექტრთან და რეგიონულ ცენტრებთანაც კი, განსხვავებული ტიპის მეთოდიკაა გამოსაყენებელი სამუშაოდ?
ჩვენ ვფიქრობთ, რომ აქ ორი პრობლემა უნდა გამოიკვეთოს:ერთი – მედიაწიგნიერების დონე ქვეყანაში არის საკმაოდ დაბალი და ის ხალხიც კი, რომლებსაც აქვთ წვდომა სოციალურ ქსელებსა თუ ინტერნეტზე საჭიროებენ ისეთი უნარების გაძლიერებას, რომლებიც დაეხმარება მათ, იყვნენ დაცულები დეზინფორმაციისგან. მეორე პრობლემა, რომელიც ასევე ძალიან მნიშვნელოვანია, ინტერნეტზე, სოციალურ ქსელებსა და ზოგადად ინფორმაციაზე ხელმისაწვდომობაა. ცხადია, ეს ორი პრობლემა განსხვავებულ მიდგომას და მუშაობას საჭიროებს, ჩვენ ვფიქრობთ ამ საკითხზე, კონკრეტულ მეთოდიკასთან დაკავშირებით, თუ როგორ ვიმუშავებთ მოსახლეობის მითითებულ ნაწილთან, ჯერ არ გვაქვს მკაფიოდ ჩამოყალიბებული აზრი, თუმცა გრძელდება კონსულტაციები ამ საკითხით დაინტერესებულ და შესაბამისი გამოცდილების მქონე პირებთან. ერთადერთი, რაც შეგვიძლია ამ ეტაპზე ვთქვათ, ვფიქრობთ, რომ მოსახლეობასთან შეხვედრები და უშუალო კომუნიკაცია/დისკუსია არის უმნიშნელოვანესი.
რა არის ის ძირითადი ღირებულებები ქართულ საზოგადოებაში, რაც გაიმედებთ, რომ ჩვენევროპის ბუნებრივი ნაწილი ვართ?
საზოგადოების ნაწილი აყოლილია რუსულ პროპაგანდას, უდიდეს ნაწილში კი საღი აზრი, სწორი პოზიციაა-საქართველოს გადარჩენა, ხსნა და განვითარება მხოლოდ მშვიდობიან ბანაკში, ევროკავშირშია. მხარდაჭერა გვაქვს მოსახლეობაში და ვცდილობთ შემოვიკრიბოთ სწორედ ასეთი პოზიციის ადამიანები, ხოლო ვისაც გააზრებული არ აქვს, დავეხმაროთ, ავუხსნათ. ქვეყნისთვის კრიტიკულ მომენტში ჩვენი მთავარი მოტივატორები საზოგადოების ღირსეული და მოაზროვნე წევრები არიან.
წელს, ‘’შინ ევროპისკენ’’ კამპანიის ფარგლებში, 3 ივლისს ჩატარებულ აქციაში მონაწილეობა სამოქალაქო მოძრაობამ ‘’თავისუფლებისთვის’’ მიიღო. სურათი, რომელსაც მაყურებელი ეკრანზე უყურებდა, ასეთი იყო: გადაჭედილ რუსთაველზე ყაბალახიანი გურულების გამოჩენისთანავე ხალხის მასა უნებურად ორად გაიყო და აპლოდისმენტები გაისმა. შეკრებილი ხალხი ყაბალახიან გურულებს ტაშს უკრავდა და ალბათ მათ დიდ ნაწილში ქვეცნობიერი პოლიტიკური მეხსიერებაც იღვიძებდა. 117 წლის წინ იყო, როცა თავზეხელაღებულმა გურულებმა რუსულ მონსტრს თვალი თვალში გაუსწორეს და წარმოუდგენელი პოლიტიკური თავხედობის ისტორია – გურიის რესპუბლიკა შექმნეს.
117 წლიანი დუმილის შემდეგ ისევ გაისმა ხმა გურიიდან, იმისთვის, რომ ქართული აზროვნება გურული ენერგიით გააძლიეროს, რაც შეუძლებლის შეძლებას, თავს ზევით ძალის პოვნას და რუსული მონსტრისთვის ისევ ცალსახა უარის თქმას გულისხმობს.
ავტორი: თამთა დოლიძე
Loading ...
