ბოლო რამდენიმე დღეა, თბილისის მსგავსად, საპატრულო პოლიცია ზუგდიდსა და ქუთაისშიც აჯარიმებს მძღოლებს, რომლებიც პროევროპულ აქციებში ავტოკოლონებში გადაადგილდებოდნენ. რადიო თავისუფლების ინფორმაციით, ამ ორ ქალაქში პოლიციამ გამოწერა, სულ მცირე, ცხრა ჯარიმა – თითოეული მძღოლისთვის ჯარიმის ოდენობა 1000 ლარია.
დავით ლოგუა ზუგდიდში 13 მაისს გამართულ საპროტესტო აქციაზე მეგობრებთან ერთად იყო. ის პოლიციამ რამდენიმე დღის წინ დააჯარიმა.
„ზუგდიდში მე-20 დღეა, რაც ვატარებთ აქციას რეჟიმის წინააღმდეგ. ერთ-ერთი აქცია იყო მანქანების კოლონით ქალაქის ქუჩების მოვლა საქართველოს და ევროკავშირის დროშით. პატრულის ეკიპაჟი აგვედევნა და სამკერდე კამერებით გვიღებდნენ. შვიდი ადამიანი დაგვაჯარიმეს, მეგობრები ყოველდღიურად ჩართული ვართ მშვიდობიან დემონსტრაციებში“, – ეუბნება რადიო თავისუფლებას დავით ლოგუა.
მისი სიტყვებით, პოლიციამ უთხრა, რომ კოლონაში მონაწილე სხვა მძღოლების გამოსავლენად ორთვიანი ვადა აქვთ.
პოლიციამ 16 დეკემბერს დააჯარიმა ფოთის ადგილობრივი ტელევიზიის „მეცხრე ტალღის“ დირექტორი და საქართველოს რეგიონულ მაუწყებელთა ალიანსის თანათავმჯდომარე გია სალია. მისი თქმით, ის 13 დეკემბერს ზუგდიდში საპროტესტო მსვლელობას იღებდა. მის მიერ გავრცელებულ ვიდეოკადრებში ჩანს პოლიციელი, რომლის თქმითაც ავტომობილი „ძებნაზე იყო გადაცემული“.
Loading ...