10 ოქტომბერს, 20:00 საათზე ექიმების აქცია გაიმართება

10 ოქტომბერს, 20:00 საათზე რუსთაველის გამზირზე ექიმების აქცია გაიმართება. ამის შესახებ სოციალურ ქსელში ბავშვთა ქირურგი ლევან ფერაძე წერს.

“ყველაზე მეტად რისი დანახვაც მინდოდა ციხეში როცა ვიყავი, ბევრი თეთრხალათიანი ექიმის დანახვა ქუჩაში. აი ზუსტად ასეთი აქციის რაც ამ სურათზეა. ზუსტად ვიცოდი, რომ არ მოხდებოდა ეგ. მინდა რომ ვცდებოდე და ვცადოთ და გავაკეთოთ! ბევრნი ხართ ექიმები ჩემ ფბ-ზე, ლოგიკურია ეს. ხოდა ამას ყველა ნახავთ. ვნახოთ რისი თავი გვაქვს!

10 ოქტომბერს, 20:00 საათზე, ყველამ შემოიცვით თეთრი ხალათები და ვანახოთ რა შეგვიძლია!”, — წერს გიორგი ახობაძე სოციალურ ქსელში.

ცნობისათვის, 4 ოქტომბრის აქციის საქმეზე გუშინ 71 წლის პედიატრი, აკადემიკოსი გიორგი ჩახუნაშვილი საკუთარი საცხოვრებელი სახლიდან აიყვანეს. ექიმები სწორედ გიორგი ჩახუნაშვილის დაკავებას აპროტესტებენ.

“მთელი ჩემი ცხოვრებაა ვემსახურები საქართველოს. 350 ათასზე მეტი ბავშვი მყავს უფასოდ გასინჯული. [ბრალს] არ ვეთანხმები. [პოლიციას] მივყვები. არაფერი გულდასაწყვეტი არ არის. სამშობლო მიყვარდა, დღესაც მიყვარს და ხვალაც მეყვარება. აქცია იყო მშვიდობიანი, არავის არაფრის გადატრიალება და გადმოტრიალება არ უნდოდა. ამას არ ვეთანხმები

…საქართველო აუცილებლად იქნება ევროატლანტიკური დიდი ოჯახის წევრი… კომუნისტური წყობის დროსაც ვიცავდი საქართველოს, გავიარე დიდი გზა, დღესაც შემიძლია, გავიარო დიდი გზა… არაფერი დათრგუნული არ ვარ. სამშობლოსთვის ვიბრძოდი, დღესაც ვიბრძოლებ. ჰა, რამდენსაც მომისჯიან, 80 წლის გამოვალ?! გამოვალ”, — ამბობს დაკავებამდე გადაღებულ ვიდეოში 71 წლის ექიმი, გიორგი ჩახუნაშვილი პოლიციელებთან საუბრისას