1-ლი მარტიდან, Turkish-ი სტამბოლი-თბილისის რეისს დღეში 2-ჯერ შეასრულებს, Pegasus-ი კვირაში 5-ჯერ

სამოქალაქო ავიაციის სააგენტომ Turkish Airlines-ის და Pegasus Airlines-ის რეგულარული რეისების ფრენის განრიგები დაამტკიცა.

1-ლი მარტიდან, ავიაკომპანია Turkish Airlines-ი სტამბოლი-თბილისი-სტამბოლის მიმართულებით ყოველდღიურად, დღეში ორჯერ იფრენს, ხოლო სტამბოლი-ბათუმი-სტამბოლის მიმართულებით ავიარეისები კვირაში ორჯერ, ოთხშაბათსა და შაბათს შესრულდება. ასევე, ავიაკომპანია ზრდის მრავალჯერადი ჩარტერული რეისების სიხშირეს თებერვლის განმავლობაში. კერძოდ, 15 თებერვლამდე, სტამბოლი-თბილისი-სტამბოლის საჰაერო ხაზზე ფრენები კვირაში 4 სიხშირით შესრულდება, ხოლო 15 თებერვლიდან თვის ბოლომდე –  კვირაში 7 სიხშირით.

4 თებერვლიდან, რეგულარულ ოპერირებაზე გადავიდა Pegasus Airlines-ი. ავიაკომპანია თავდაპირველად ფრენებს კვირაში 4 სიხშირით შეასრულებს, ხოლო 12 თებერვლიდან დაემატება კიდევ 1 სიხშირე.

პირველი თებერვლიდან, ევროკავშირის, ისრაელის, შვეიცარიის, აშშ-ის, საუდის არაბეთის, არაბთა გაერთიანებული საემიროების, ბაჰრეინის მოქალაქეებსა და რეზიდენტებს შესაძლებლობა აქვთ, საქართველოში შემოვიდნენ ბოლო 72 საათში გაკეთებული PCR ტესტის ნეგატიური პასუხით და ქვეყანაში შემოსვლიდან მე-3 დღეს ჩაიტარონ PCR ტესტი. ამ სიას მთავრობის ბოლო გადაწყვეტილებით თურქეთიც დაემატა.