ჰაიტის დედაქალაქ პორტ-ო-პრენსის მთავარ ციხეში შეიარაღებული ჯგუფები შეიჭრნენ და 4 000-მდე პატიმრიდან თითქმის ყველა გაათავისუფლეს, – ინფორმაციას BBC-ი ავრცელებს.
დაკავებულთა შორის იყვნენ ბანდის წევრები, რომლებსაც ბრალი ედებოდათ 2021 წელს პრეზიდენტ ჯოვენელ მოისის მკვლელობაში.
გავრცელებული ინფორმაციით, ორმხრივი სროლის შედეგად არიან დაღუპულები და დაშავებულები როგორც პატიმრებს, ასევე პოლიციელებს შორის.
ჰაიტიში ძალადობის ფაქტები ბოლო წლებში გახშირდა. ბანდები, რომელთა სამიზნე პრემიერ-მინისტრი არიელ ჰენრია, პორტ-ო-პრენსის 80%-ს აკონტროლებენ. ჰენრიმ პრემიერ-მინისტრის თანამდებობა მოისის მკვლელობის შემდეგ დაიკავა და ქვეყანაში საპარლამენტო და საპრეზიდენტო არჩევნების ჩატარების გეგმა არაერთხელ გადადო.
ჰაიტიში მდგომარეობა ხუთშაბათს გაუარესდა, როდესაც პრემიერ-მინისტრი ნაირობიში გაემგზავრა, რათა ქვეყანაში კენიის ხელმძღვანელობით მრავალეროვნული უსაფრთხოების ძალების გაგზავნის საკითხი განეხილა. ბანდის ლიდერმა, ჯიმი შერიზიემ მის გადასაყენებლად კოორდინირებული თავდასხმა გამოაცხადა.
Loading ...
