ჯო ბაიდენმა და კამალა ჰარისმა საზოგადოებას მიმართეს

ამერიკის შეერთებული შტატების არჩეულმა პრეზიდენტმა, ჯო ბაიდენმა ამერიკელ ხალხს მიმართა. ბაიდენის თქმით, მან ამომრჩევლის 75 მილიონზე მეტი ხმა მიიღო. „სიენენის“ ცნობით, ბაიდენმა აღნიშნა, რომ ამერიკელებმა მას სუფთა და დამაჯერებელი გამარჯვება მიანიჭეს. ბაიდენის თქმით, ის იქნება გამაერთიანებელი პრეზიდენტი და არა პირიქით, გამყოფი.

„დემოკრატმა“ ჯო ბაიდენმა მიმართვისას განაცხადა, რომ მისი მიზანი არის, „ამერიკას კვლავ პატივს სცემდნენ მსოფლიოში“.

მივმართავ მათ, ვინც ხმა პრეზიდენტ ტრამპს მისცა, მესმის, რომ დღეს იმედგაცრუებული ხართ. მეც წამიგია რამდენჯერმე, მაგრამ მოდით, მივცეთ ერთმანეთს შანსი, – ამის შესახებ საზოგადოებისადმი მიმართვისას აშშ-ის არჩეულმა პრეზიდენტმა, ჯო ბაიდენმა განაცხადა.

ჯო ბაიდენმა აღნიშნა, რომ აშშ-ის ბედს მის უკეთეს მხარეებსა და ბნელ იმპულსებს შორის მუდმივი ბრძოლა განსაზღვრავს.

„ის, თუ რას ამბობს პრეზიდენტი ამის თაობაზე, მნიშვნელოვანია. დროა, რომ ჩვენმა უკეთესმა მხარემ გაიმარჯვოს“, – განაცხადა ჯო ბაიდენმა.

ჯო ბაიდენმა ასევე აღნიშნა, რომ ამერიკა მსოფლიოსთვის შუქურაა.

„ჩვენ ვიქნებით ლიდერები არა მხოლოდ ჩვენი ძალაუფლების მაგალითზე, არამედ ჩვენი ძლიერი მაგალითებითაც“, – განაცხადა ჯო ბაიდენმა.

ამასთან, საზოგადოებას მიმართა არჩეულმა ვიცე-პრეზიდენტმა კამალა ჰარისმა. მან მადლობა გადაუხადა ამომრჩევლებს რეკორდული აქვივობისთვის.

„ჩვენს ქვეყანას ყველა ბავშვისთვის, მიუხედავად მათი სქესისა, ნათელი გზავნილი აქვს – იოცნებეთ ამბიციურად, წინ იარეთ საკუთარი თავის რწმენით და ისე დაინახეთ საკუთარი თავი, როგორც შეიძლება სხვამ ვერ დაგინახოთ, რადგან მათ ეს უბრალოდ აქამდე არ უნახავთ. მაგრამ იცოდეთ, ჩვენ თქვენს ყოველ ნაბიჯზე ტაშს დაგიკრავთ“, – განაცხადა კამალა ჰარისმა.

ჰარისმა მიმართვისას საკუთარ დედაზეც ისაუბრა, რომელიც 19 წლის ასაკში ინდოეთიდან აშშ-ში ჩავიდა.

„როდესაც დედაჩემი აქ ჩამოვიდა, ალბათ ეს მომენტი არ წარმოედგინა, თუმცა სჯეროდა იმ ამერიკის, სადაც ასეთი რამ შესაძლებელია. მე ვფიქრობ მასზე და ქალების თაობებზე, შავკანიან, აზიელ, თეთრ, ლათინოამერიკელ და ინდიელ ქალებზე, რომლებმაც ჩვენი ისტორიის განმავლობაში გზა გაგვიკვალეს დღევანდელ საღამომდე; ქალებზე, რომლებმაც ძალიან ბევრი შესწირეს თანასწორობას, თავისუფლებასა და უპირველეს ყოვლისა, სამართლიანობას. მათ შორის შავაკანიანმა ქალებმა, რომლებიც ხშირად ყურადღების მიღმა რჩებიან, თუმცა გვარწმუნებენ, რომ ისინი ჩვენი დემოკრატიისთვის საყრდენები არიან.

დღეს მე მათ გამოწვევებზე, მიზანმიმართულობასა და მათი ხედვის სიძლიერეზე ვფიქრობ, რათა გავიაზრო, თუ რა შეიძლება, შევცვალოთ იმით, რაც უკვე მოხდა. მე მათ მხრებზე ვდგავარ“, – განაცხადა კამალა ჰარისმა.