საქართველოს საპატრიარქოს საზოგადოებასთან ურთიერთობის სამსახურის უფროსი, დეკანოზი ანდრია ჯაღმაიძე ადასტურებს, რომ პატრიარქ ილია II-ის 2025 წლის საახალწლო მილოცვის ვიდეო დამონტაჟებული იყო. მისივე თქმით, სწორედ ამ მიზეზით არ გამოქვეყნდა მილოცვა საპატრიარქოს საზოგადოებასთან ურთიერთობის სამსახურის გვერდზე.
როგორც ჯაღმაიძე განმარტავს, არც პირადად მას და არც სამსახურს ვიდეოსთან არაფერი აკავშირებთ.
“პატრიარქის საახალწლო მილოცვასთან დაკავშირებით ზოგი ადამიანი “საპატრიარქოს საზოგადოებასთან ურთიერთობის სამსახურს” იხსენიებს აუგად.
დეტალურ ახსნებს ვერ დავიწყებ რიგი მიზეზების გამო, უბრალოდ სიმართლე იმაში მდგომარეობს, რომ არაფერი ამასთან არც მე პირადად და არც სამსახურს არ აკავშირებს.
ამასთანავე რადგან ასეთი სახის დამონტაჟებული იყო, ვიდეო არ დევს ჩვენი სამსახურის გვერდზე. მიმაჩნია, მინიმუმ მითითებული უნდა ყოფილიყო, რომ ეს არის მონტაჟი და არა ორიგინალი”, – წერს დეკანოზი ანდრია ჯაღმაიძე.
საპატრიარქოს პრესსპიკერი პოსტში, სავარაუდოდ, პატრიარქის სამდივნოსა და შესაძლოა, მდივან-რეფერენტ შორენა თეთრუაშვილსაც გულისხმობს.
ილია მეორის 2025 წლის საახალწლო მილოცვა Facebook გვერდზე – საქართველოს საპატრიარქო ❲ოფიციალური გვერდი❳ გამოქვეყნდა, რასაც მოქალაქეების მხრიდან კრიტიკა მოჰყვა. მოქალაქეები სოციალურ ქსელში წერდნენ, რომ ვიდეო დამონტაჟებულია და ის პატრიარქის 2023 წლისა და 2024 წლის საახალწლო მილოცვებისგან შედგება.
ამის ამსახველი ვიდეო, სოციალურ ქსელში დეკანოზმა ილია ჭიღლაძემ გამოაქვეყნა.
Loading ...