“ხმაურიანი მოგზაურობა გამოგვივიდა” – ირაკლი ზარქუამ აბუ-დაბიში მომხდარ ინციდენტზე ისაუბრა

„ამ 3 და 4 ათას დოლარს, ბუნებრივია, ჩვენ გადავიხდით”. – თქვა ზარქუამ.

 ირაკლი ზარქუას მტკიცებით, ის, “რაც აბუ-დაბიში მოხდა საამაყო არ არის”, მაგრამ “თმენის ვალდებულების მიუხედავად, ყოველთვის ასეთი რეაგირება ექნება”.

ასევე, ზარქუას თქმით, ლაშა გაბიტაშვილმა “მისაღები მიიღო”.

“ხმაურიანი მოგზაურობა გამოგვივიდა აბუ-დაბიში. უპირველეს ყოვლისა, მადლობა მინდა ვუთხრა ყველა იმ მხარდამჭერს, ნაცნობს, უცნობს, ვინც მთელი ამ პერიოდის განმავლობაში ჩვენ გვწერდა და გვამხნევებდა, გვეუბნებოდა, რომ სწორად მოვიქეცით. მაგრამ აქვე მინდა დავძინო, რომ ის რაც მოხდა, საამაყო არ არის, მაგრამ ოჯახის, შვილების, ახლობლების შეურაცხყოფაზე, მიუხედავად თმენის ვალდებულებისა, ყოველთვის ასეთი რეაგირება გვექნება, რადგან კაცები ვართ და ქართველები ვართ. ჯერ პირველ დღეს, საუზმისას ცდილობდა [ლაშა გაბიტაშვილი] პროვოკაცია მოეწყო და მისაღები მიიღო.

მერე მეორე დღესაც, ეს ცოლ-ქმარი, რეჟისურა, დადგმული, როგორ ახერხებდნენ ამას, რომ ის მონაკვეთი გადაეღოთ და შემდეგ გაევრცელებინათ. მესამე დღეს მოხდა ის, რაც მოხდა და ყველამ ნახეთ”, – ირწმუნება ზარქუა.

ირაკლი ზარქუა და ვიქტორ სანიკიძე 13 იანვარს აბუ-დაბიში საქართველოს მოქალაქეს ფიზიკურად გაუსწორდნენ. ლაშა გაბიტაშვილმა სასტუმროში გადაღებული ვიდეო სოციალურ ქსელში გაავრცელა. „ფეისბუქის“ პირდაპირ ეთერში ის ყვებოდა, რომ სასტუმროში საუზმის დროს „ოცნების“ წევრები მასთან წინა დღეს მომხდარის გამო მიცვივდნენ.

წინა დღეს ლაშა გაბიტაშვილმა აბუ-დაბიში პროტესტი გამოხატა „ოცნების“ წევრების მიმართ მათი ქმედებების, მათ შორის, ბათუმში აქციის მონაწილეების გამო და ამის ამსახველი ვიდეოებიც გამოაქვეყნა.