აქციის „შინ ევროპისკენ“ ორგანიზატორებმა ევროპული საბჭოს გადაწყვეტილების შემდეგ ბრიფინგი გამართეს. სამოქალაქო მოძრაობა „სირცხვილიას“ წარმომადგენელმა შოთა დიღმელაშვილმა ილაპარაკა თბილისში, პარლამენტის წინ დაგეგმილი აქციის შესახებ.
„24 ივნისს, 20:00 საათზე ყველანი შევიკრიბებით პარლამენტის წინ, რათა გამოვაცხადოთ მოთხოვნები ხელისუფლების წინააღმდეგ და უზრუნველვყოთ ის, რომ საქართველო კვლავ გახდეს ლიდერი ევროინტეგრაციის გზაზე, დაეწიოს მოლდოვას და უკრაინას“, – თქვა დიღმელაშვილმა.
როგორც სამოქალაქო აქტივისტი აცხადებს, 20 ივნისს ქართველმა ხალხმა მართლაც გამოხატა საკუთარი მყარი არჩევანი, 85%-ის მყარი არჩევანი და არა მხოლოდ მათი, არამედ იმ წინაპრების, რომლებმაც სისხლი და ოფლი დაღვარეს იმისათვის, რომ საქართველო ევროპასთან დაეახლოებინათ.
„როდესაც გადამწყვეტი ნაბიჯის გადადგმაღა იყო დარჩენილი, ჩვენმა ხელისუფლებამ დაიწყო, პირდაპირ შეგვიძლია ვთქვათ, რომ 22 ივნისის ანგარიშის ჩაბარება პრემიერ-მინისტრის მხრიდან იყო მიზანმიმართული დივერსია საქართველოში, რომ ვერ მოეხერხებინა ევროპის კარის შეღება. თუმცაღა ევროპელი პარტნიორები გაგებით ეკიდებიან ჩვენს პატარა წაბორძიკებას ჩვენს ევროპულ გზაზე, რაც მხოლოდ ამ ხელისუფლების პასუხისმგებლობაა“, – აღნიშნა მან.
23 ივნისს ევროპულმა საბჭომ უკრაინასა და მოლდოვას კანდიდატის სტატუსი მიანიჭა, საქართველოს კი – ევროპული პერსპექტივა და განაცხადა, რომ მზადაა კანდიდატის სტატუსი მისცეს, როგორც კი დასახული პრიორიტეტები შესრულდება.
Loading ...
