ლანჩხუთის მუნიციპალიტეტის სოფელ წყალწმინდის მოსახლეობა სოფელში შექმნილ უმძიმეს ვითარებაზე საუბრობს. სოფელში შიდა გზა სრულიად ამორტიზებულია, არ არის ზღვაზე გასასვლელი და მძიმე ეკონომიკური მდგომარეობიდან გამომდინარე, ახალგაზრდების ემიგრაციაც დაიწყო.
წყალწმინდელების თქმით, ხელისუფლებისადმი მრავალგზის თხოვნის და განცხადების დაწერის მიუხედავად, პრობლემა ლანჩხუთის მერიას არ გადაუჭრია.
ლანჩხუთის მერი ალეკო სარიშვილი ამბობს, რომ მუნიციპალიტეტში პრობლემები ეტაპობრივად გვარდება.
_ მიმდინარე წელს დაიწყება სამუშაოები და 600 კომლს ექნება წყალი. გზის სიტუაციაც ეტაპობრივად, რა საშუალებაც გამოჩნდება, იქნება მოგვარებული.
_ ორი წელია, რაც თქვენ მერი ხართ. ორი წლის განმავლობაში რამდენჯერმე მოგმართათ მოსახლეობამ და ამბობენ, რომ ყოველთვის ბუნდოვანი პასუხები გქონდათ.
_არასდროს ყოფილა ბუნდოვანი პასუხები. გეუბნებით, რომ ეტაპობრივად მოგვარდება, შიდა გზების პრობლემა მოსახლეობას სხვა სოფლებშიც აქვს.
_ ეს უკვე მონასმენი აქვს მოსახლეობას. კონკრეტულად პროექტი თუ არსებობს ამ პრობლემის მოგვარებასთან დაკავშირებით?
_ წყალწმინდაში შიდა გზების მოწესრიგებასთან დაკავშირებით ჯერჯერობით კონკრეტული პროექტი არ არსებობს.
სიუჟეტი პროექტის ”ახალგაზრდები რეგიონის განვითარებისთვის” ფარგლებში საბა ბედინეიშვილმა მოამზადა.
Loading ...