“ხელახალი არჩევნების ჩატარება და დაკავებულების გათავისუფლება” – სამი გამარჯვებული კოალიციის მოთხოვნები

3-მა გამარჯვებულმა, ოპოზიციურმა კოალიციამ რიგით მეორე შეხვედრა გამართა.

მოგვიანებით მათ ერთობლივი განცხადებაც გააკეტეს, რომლის თანახმადაც ოპოზიციას 2 მთავარი მოთხოვნა აქვს – ხელახალი არჩევნების ჩატარება და დაკავებულების გათავისუფლება.

გარდა ამისა, პროდასავლური პარტიები ამბობენ, რომ ერთადერთი ლეგიტიმური ინსტიტუტი ქვეყანაში პრეზიდენტია, შესაბამისად სალომე ზურაბიშვილი უნდა დარჩეს თანამდებობაზე.

“ჩვენ, 26 ოქტომბრის არჩევნებში გამარჯვებული პოლიტიკური პარტიები, არ ვცნობთ და არ ვაღიარებთ თვითგამოცხადებულ ხელისუფლებას, მის არცერთ შტოს.

ივანიშვილმა პროპაგანდით დაპირებული მშვიდობის მაგიერ ღია რეპრესიები, ტერორი და წამება დაუპირისპირა საქართველოს მოქალაქეების გაცხადებულ, ევროპულ არჩევანს. მისმა ბანდფორმირებებმა 500-მდე ადამიანი პოლიტპატიმრად აქცია, რომელთაგანაც 400-მდე წამებისა და არაადამიანური მოპყრობის მსხვერპლი გახდა. პასუხად ქართველი ხალხი აგრძელებს უწყვეტ, მტკიცე და უპრეცედენტოდ მასშტაბურ პროტესტს მთელ საქართველოში, რაც გამარჯვების მთავარი წინაპირობაა. მთელი ცივილიზებული სამყარო, საქართველოს ლეგიტიმური პოლიტიკური სპექტრი და მოქალაქეთა აბსოლუტური უმრავლესობა, მოვითხოვთ, საქართველოს ევროპული და დემოკრატიული მომავლისთვის მებრძოლი პოლიტპატიმრების გათავისუფლებას – ყველა პირი, რომელიც ძალადობს მშვიდობიან დემონსტრანტებზე, პასუხს აგებს დამოუკიდებელი მართლმსაჯულების წინაშე…

ერთადერთი ლეგიტიმური სახელმწიფო ინსტიტუტი პრეზიდენტია, შესაბამისად, საქართველოს ლეგიტიმური წარმომადგენელი სალომე ზურაბიშვილია. არ ვცნობთ, 14 დეკემბერს ივანიშვილის მიერ მიტაცებულ ე.წ. პარლამენტს, რომელსაც არც საერთაშორისო და, არც ჩვენი პოლიტიკური ლეგიტიმაცია აქვს, ჩანიშნულ ე.წ საპრეზიდენტო არჩევნებს. არალეგიტიმურ პარლამენტს არ გააჩნია პრეზიდენტის არჩევის უფლებამოსილება – ამდენად სალომე ზურაბიშვილი რჩება საქართველოს პრეზიდენტად, თავდაცვის ძალების მთავარსარდლად და ქვეყნის უმაღლეს წარმომადგენლად საგარეო ურთიერთობებში. შექმნილი უმძიმესი პოლიტიკური კრიზისიდან არსებობს ერთადერთი გამოსავალი – ახალი და სამართლიანი არჩევნები. ვაფასებთ, საერთაშორისო პარტნიორების თანადგომას და ველით შემდგომ ქმედით და მკვეთრ ნაბიჯებს”, – ამბობს 3 გამარჯვებული კოალიცია.