„ხალხის ძალა“ მედიისა და აშშ-ს საელჩოს წინააღმდეგ განცხადებას ავრცელებს

მოძრაობა “ხალხის ძალა” მორიგ ანტიდასავლური რიტორიკის განცხადებას ავრცლებს და ამჯერად ამერიკის საელჩოსთან ერთად კრიტიკულ ტელევიზიებს აკრიტიკებს. განცხადების ავტორები ამტკიცებენ, რომ “ნაციონალური მოძრაობის კუთვნილი მედიასაშუალებები” ყოველ დღე სიცრუეს და სიძულვილს ტირაჟირებენ.

მათივე აზრით, ტელევიზიების უმთავრესი ამოცანა “ადამიანების დემორალიზება, ნიჰილიზმის დათესვა, ტრადიციული ღირებულებებისგან ადამიანების დაცლა, მანიპულირების ბრმა იარაღად საზოგადოების ქცევა და შედეგად, სახელმწიფოში სრული პოლიტიკური ინტერვენციის უზრუნველყოფაა”.

“თანამედროვე მედიაში მოჭარბებული სიცრუისა და ზიზღის ენის აღკვეთის ნებისმიერ მცდელობას, როგორც მსოფლიოში, ისე საქართველოში, აგრესიულად უპირისპირდებიან ე.წ. ლიბერალები, რომლებიც გამოხატვის თავისუფლების საფარქვეშ, სინამდვილეში, სწორედ საკუთარი პოლიტიკური ჰეგემონიის მთავარ იარაღს – სიცრუესა და სიძულვილს იცავენ. ე.წ. ლიბერალური იდეოლოგიის გავრცელების მთავარ ინსტრუმენტად საქართველოში სწორედ ნაციონალური მოძრაობის კუთვნილი მედიასაშუალებებია ქცეული. „დესამშობლოიზაცია“ ამ მედიასაშუალებების მთავარმა ლიდერმა საკუთარ მიზნად ღიადაც დააფიქსირა. ნაცმოძრაობის კუთვნილი ტელევიზიები სრულად ჩაკეტილი არიან ნებისმიერი ალტერნატიული აზრისთვის და ისინი დაუფარავად ებრძვიან ყველაფერ ქართულს, განსაკუთრებით კი – სახელმწიფო ინტიტუტებსა და ეკლესიას, აგრესიულად ცდილობენ, დანერგონ იმგვარი აზროვნება და ფსევდოღირებულებები, რომლებიც ქართული საზოგადოებისთვის ორგანულად არის მიუღებელი”, – წერია განცხადებაში.
“ხალხის ძალა” ამბობს, რომ “ე.წ. ლიბერალები” მათ “პრობლემის მოგვარებაზე ფიქრსაც კი” უკრძალავენ. განცხადებაში აღნიშნულია, რომ “ნაცმოძრაობის ტელევიზიების” შესანახად დიდი ოდენობით შავი ფული იხარჯება, ხოლო რეიტინგების მიხედვით, ჯამში მათ მოსახლეობის 10-15 პროცენტი უყურებს.

“ნაციონალური მოძრაობის კუთვნილი ტელევიზიების მთავარი მომხმარებელი და დამკვეთი საელჩოა, რომელიც თავის მთავარ შანსს სწორედ ქართული პოლიტიკის რადიკალიზაციაში და სიცრუითა და სიძულვილით საზოგადოების ინსტრუმენტალიზაციაში ხედავს. სახელმწიფო ინსტიტუტებისა და ეკლესიის წინააღმდეგ მიმართულ კამპანიაში, საელჩოს ფავორიტი რადიკალური ოპოზიციისა და ენჯეოების მხარდამხარ, ყველაზე აქტიურად არის ჩართული სწორედ მათთან დაკავშირებული მედია. სწორედ ეს მედია აღვივებს აქტიურად სიძულვილსა და რადიკალიზმს, რაც ქართულ პოლიტიკურ სისტემას ე.წ. პოლარიზაციის ჩაკეტილი წრის გარღვევის შესაძლებლობას არ აძლევს. აშკარაა, რომ ეს რადიკალიზმი, როგორც ხალხის ნების წინააღმდეგ ხელისუფლების შეცვლის მთავარი ინსტრუმენტი, საელჩოს მიერ არის დაკვეთილი და ნასაზრდოები”, – წერია განცხადებაში.”ხალხის ძალა” ამბობს, რომ “ქართულ ოცნებას” არ ჰყოფნის გამბედაობა, ამერიკელებს დაუპირისპირდეს და ქვეყნისა და საზოგადოებისათვის ესოდენ მნიშვნელოვანი ნაბიჯი გადადგას.