“კოალიცია ცვლილებისთვის” ერთ-ერთ ლიდერს, ზურაბ გირჩი ჯაფარიძეს თბილისის პროკურატურაში ბრალი წარუდგინეს. მას წულუკიანის კომისიაზე გამოუცხადებლობას ედავებიან. სავარაუდოდ, დღესვე ჩაინიშნება სასამართლოც, სადაც ჯაფარიძის მიმართ აღკვეთ ღონისძიებაზე იმსჯელებენ.
სხდომაზე პროკურატურა დიდი ალბათობით გირაოს შეფარდებას მოითხოვს, თუმცა ჯაფარიძე ამბობს, რომ გადახდას არ აპირებს.
ბრალი წარმიდგინეს იმის გამო, რომ არ მივედი იმ რაღაც ვითომ კომისიაზე. არანაირი გირაოს გადახდას არ ვაპირებ და ამაზე საჯაროდ ვთქვი, არცერთი ლარის გადამხდელი მე არ ვარ. არსად გამქცევი მე არ ვარ, სასამართლო არის ამ ქვეყანაში ერთადერთი ინსტანცია, სადაც ჩემი ნებით დავდივარ, არა იმის გამო, რომ იმედი მაქვს, რომ იქ სამართალს ვიპოვი, უბრალოდ სასამართლო არის ადგილი, სადაც ნორმალურ ქვეყნებში სამართალს მოიპოვებენ, ხოლო ჩვენნაირ ქვეყნებში სასამართლო არის, სადაც ყველაზე მეტად ყარს და ჩემი ნებით დავდივარ რომ ეს სიმყრალე შევიგრძნო. მასალები, რაც გადმომცეს, ჩემი “ვოცაპის” ჩატის ამონაწერები არის, სადაც მემესიჯებიან რომ დაბარებული ვარ და მე ვეუბნები, რომ არ მოვალ და არის ჩემი Facebook პოსტები, სადაც რამდენჯერმე დავწერე, რომ ვაი თქვე ***ებოო და ეს აქვთ გადიდებული, 80-იანი ფონტით აქვთ და უდევთ საქმის მასალებში” – თქვა ჯაფარიძემ “ფორმულასთან”, პროკურატურიდან გამოსვლის შემდეგ.
ცნობისთვის, “პარლამენტის დროებითი საგამოძიებო კომისიის” დაბარების შემთხვევაში, სხდომაზე არმისვლა სისხლის სამართლის კოდექსის 349-ე მუხლით გათვალისწინებულ დანაშაულად ითვლება, რაც “საქართველოს პარლამენტის დროებითი საგამოძიებო კომისიის მოთხოვნის შეუსრულებლობას” გულისხმობს. ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.
Loading ...