4 აპრილს, დილით ოზურგეთის აგრარულ ბაზარში მისულ მოვაჭრეებს ბაზარი დახურული დახვდათ. ეს გადაწყვეტილება მათთვის მოულოდნელი აღმოჩნდა. როგორც მოვაჭრეები ყვებიან, ისინი არავის გაუფრთხილებია, რომ ბაზარს ასე უცებ დაკეტავდნენ. მათივე თქმით, მოლოდინი ჰქონდათ, რომ ოზურგეთის მერია ან ბაზრის დირექცია ერთი დღით ადრე მაინც გააფრთხილებდა ბაზრის დახურვასთან დაკავშირებით. მოვაჭრეების უმრავლესობა მოულოდნელად, ხელში პროდუქციით და მყიდველის გარეშე დარჩა. პროდუქციის დიდი ნაწილი, რომლითაც ოზურგეთის აგრარულ ბაზარში ვაჭრობდნენ, მალფუჭებადია, შესაბამისად, მოვაჭრეები საკმაოდ დაზარალებულები აღმოჩნდნენ.
”უცებ დაგვკეტეს და რაღა მექნა, მივიტანე ჩემი საქონელი სახლში, ყრია, ლპება და ვყრი. ბოსტნეულია და დიდხანს როგორ გაძლებდა. ახლა,მოვედი, ავალაგე აქ რაც მქონდა დარჩენილი და აწი არ ვიცი რა იქნება. კორონა მოგვკლავს თუ შიმშილი, რაღა მნიშვნელობა აქვს” – აცხადებს ოზურგეთის ბაზარში მოვაჭრე.
”წინასწარ არავის არ უთქვამს, რომ ბაზარი დაიკეტებოდა. წინა დღით მხოლოდ გაგვაფრთხილეს, შეიწიეთ, გზა გაათავისუფლეთო. შეიწია ეს ხალხი და მორჩა, მეორე დღეს მოვედით და ბაზარი დაგვხვდა დაკეტილი. ასე არ შეიძლება. გაეფრთხილებინათ ეს ხალხი. ამათ მოაქვთ მალეფუჭებადი პროდუქტები, ეს არის მათი საარსებო წყარო და ამისთვის ბანკიდან აქვთ ფული გამოტანილი. მოვიდნენ და დაგვიკეტეს ბაზარი. სად წაიღოს ამ ხალხმა ეს საქონელი? ლპება პროდუქტები, მიეცით ხალხს საშუალება, რომ გაიტანონ ეს საქონელი და მთავრობამ და ბაზრის დირექციამ მიეცით რეკომენდაცია რა გააკეთონ, დააყენეთ გზაზე. მაგალითად, აი, ჩვენ მაქვს კერძო მაღაზია ბაზარში, მიფუჭდება საქონელი, იმხელა ნაშთი მაქვს მაღაზიაში, პროდუქციას ვადა რომ გაუვა, უნდა გადავყარო. ვინ ამინაზღაურებს ამას? ასჯერ შეგვამოწმა სანიტარულმა ინსპექციამ, დაცული მქონდა ყველა ნორმა, მქონდა ორმეტრიანი დისტანცია,დეფინფექცირება. იატაკს ქლორით ვწმენდდი, ზედაპირებს -სპირტით. მეტი რა უნდა გამეკეთებინა? მიაქციეთ ამ ხალხს ყურადღება, ეს ხალხი დაბნეულია, ისედაც არაფრის მქონენი არიან, ესენი არ არიან მარკეტების მფლობელები, არ არიან ბობოლა ხალხი, შესაძლოა არ ესმით იმდენი, რას ითხოვს მთავრობა, ხოდა გასაგებ ენაზე აუხსენით და დააყენეთ გზაზე”. – აცხადებს აგრარულ ბაზარში ერთ-ერთი მაღაზიის მფლობელი მზია ქიმაძე.
ოზურგეთის მუნიციპალიტეტის მერიაში ამბობენ, რომ მოვაჭრეები წინა დღით გააფრთხილეს, თუმცა კონკრეტიკა, რომ ბაზარი აუცილებლად მეორე დღეს დაიკეტებოდა, არ ყოფილა.
”წინა დღით ზედამხედველობის სამსახურმა ხელში მეგაფონით ჩამოიარა მთელი ბაზარი და მოვაჭრეები გააფრთხილა, რომ თუ მდგომარეობა არ შეიცვლებოდა, ბაზარი დაიხურებოდა. გავაფრთხილეთ, რომ ეს შესაძლოა ხვალაც მომხდარიყო. ბაზრის დახურვა მოვაჭრეების მიერ წესების დაუცველობის გამო არ მომხდარა, სამწუხაროდ, მყიდველი მოქალაქეები არ იცავდნენ რეგულაციებს.” – აღნიშნეს ოზურგეთის მუნიციპალიტეტის მერიაში.
Loading ...