წინასწარი პროგნოზით, „კოვაქსის“ პლატფორმის საშუალებით, საქართველო „კოვიდ-19“-ის საწინააღმდეგო ვაქცინის 214 000 დოზას მიიღებს

„კოვაქსმა“ საერთაშორისო მექანიზმით „კოვიდ-19“-ის საწინააღმდეგო ვაქცინების განაწილების პროგნოზი გამოაქვეყნა.

ვაქცინების მიწოდება თებერვალში დაიწყება და აცრებს, სავარაუდოდ, 145 ქვეყნის მოსახლობის 3,3 პროცენტი გაიკეთებს.

ოფიციალურ ვებგვერდზე გამოქვეყნებული დოკუმენტის მიხედვით, „კოვაქსით“ ვაქცინების ყველაზე მეტ დოზას ინდოეთი მიიღებს – 97 164 000 დოზა, მეორე ადგილზეა ბანგლადეში – 12 782 000 დოზით, შემდეგ მოდის ბრაზილია, რომელიც 10 672 000 დოზას მიიღებს.

ამავე დოკუმენტის მიხედვით, საქართველო „კოვაქსის“ მეშვეობით „კოვიდ-19“-ის საწინააღმდეგო ვაქცინის 214 000 დოზას მიიღებს; აზერბაიჯანი – 506 000 დოზას; სომხეთი – 146 000 დოზას, ხოლო უკრაინა 1  215 000 დოზას.

ამასთან, „კოვაქსში“ განმარტეს, რომ ეს დოკუმენტი წინასწარ პროგნოზს წარმოადგენს და რიცხვები შესაძლოა, შეიცვალოს.

„კოვაქსის“ მექანიზმით, რომლის ინიციატორიც ჯანდაცვის მსოფლიო ორგანიზაციაა, დაგეგმილია ბრიტანულ-შვედური კომპანია „ასტრაზენეკასა“ და ამერიკული კომპანია „ფაიზერისა“ და მისი გერმანული პარტნიორის „ბიონტექის“ ვაქცინების დისტრიბუცია.

„კოვაქსის“ გეგმის მიხედვით, 2021 წლის ბოლომდე მთელ მსოფლიოში ვაქცინების ორი მილიარდი დოზა უნდა დარიგდეს.