წვიმა ოთახებში და დახმარების გარეშე დარჩენილი მოქალაქეები დაბა ნასაკირალში – მერიაში არ იციან სამუშაოები როდის დაიწყება

ოზურგეთში, დაბა ნასაკირალში 28 მარტს ძლიერი ქარის შედეგად დაზიანებულ კორპუსზე სახურავი ჯერაც არ შეკეთებულა. დაბა ნასაკირალის მაჟორიტარი დეპუტატი ბესო ქათამაძე სოციალურ ქსელში კორპუსის მცხოვრებლების ბინების ფოტოებს აქვეყნებს და ხელისუფლებას დროული რეაგირებისკენ მოუწოდებს.

” ოზურგეთის მუნიციპალიტეტის მერია • Ozurgeti City Hall რამე სახის პასუხისმგებლობა გაგაჩნიათ საკუთარ მოქალაქეებთან, სამი კვირაა ხალხი ასეთ დღეშია, დღეს ხვალ ძახილში დაენგრათ ყველაფერი. გულგრილი დამოკიდებულებით აუბედურებთ ადამიანებს თქვე უპასუხისმგებლო კორუპირებულებო, საძმაკაცო ტენდერი თუ ვერ გააგორეთ ორიკაპიკის მოსაპარად, ისე საქმეს არ აკეთებთ.

შეგახსენებთ, რომ 28 მარტს ოზურგეთში ძლიერმა ქარმა მნიშვნელოვანი ზარალი გამოიწვია. დაზიანდა, როგორც საცხოვრებელი კორპუსები, ასევე კერძო სახლები. მწყობრიდან გამოვიდა ელექტროგადამცემი ხაზები. ქარმა მოგლიჯა ხეებიც.

როგორც ოზურგეთის მუნიციპალიტეტის მერიაში აცხადებენ, დოლიძის ქუჩაზე მდებარე საცხოვრებელი კორპუსის სახურავის აღდგენითი სამუშაოები უკვე დასრულდა. რაც შეეხება, დაბა ნასაკირალში მდებარე კორპუსს, მერიის ცნობით, სამუშაოების დაწყების თარიღი უცნობია. ”გურიაTV”-ის ინფორმაციით, ამ მიმართულებით ჯერ არც ტენდერია გამოცხადებული. შესაბამისად, როდის მიიღებენ საჭირო დახმარებას ამ კორპუსში მცხოვრები მოქალაქეები, გაურკვეველი და ბუნდოვანია.